Holandë, 2 persona të dyshuar si bartës të variantit Omicron kapen teksa po iknin nga karantina
Dy nga 61 pasagjerët që mbërritën nga Afrika e Jugut më 26 nëntor dhe u futën në karantinë për shkak se kishin rezultuar pozitivë me COVID-19 u kapën duke u përpjekur për të shkuar në Spanjë
Amsterdam
Dy persona që mbaheshin në karantinë në Holandë me dyshimin se bartnin variantin Omicron të koronavirusit të ri (COVID-19) u kapën në përpjekje për të ikur nga vendi me avion për në Spanjë, transmeton Anadolu Agency (AA).
Në një deklaratë të bërë nga Policia Mbretërore e Holandës (Koninklijke Marechaussee) në Twitter thuhet se dy nga 61 pasagjerët që mbërritën nga Afrika e Jugut më 26 nëntor dhe u futën në karantinë për shkak se kishin rezultuar pozitivë me COVID-19 u kapën duke u përpjekur për të shkuar në Spanjë.
Më tej thuhet se personat e kapur teksa avioni për në Spanjë po nisej, iu dorëzuan Shërbimit Shëndetësor të Bashkisë (GGD) për të vazhduar karantinimin.
Nuk dihet se si çifti, njëri nga Spanja dhe tjetri nga Portugalia, u arratisën nga hoteli i karantinës pranë aeroportit Schiphol. Autoritetet për mediat lokale thanë se janë të habitur me rastin pasi hyrjet dhe daljet e hotelit ku qëndronin çifti në fjalë ishin të ndaluara.
Mësohet se pas përfundimit të karantinës, ndaj çiftit do të niset një hetim për shkelje të rregullave të karantinës.
- Varianti Omicron i COVID-19 është regjistruar tek 13 persona
Instituti Shtetëror për Shëndetin dhe Mjedisin (RIVM), i lidhur me Ministrinë holandeze të Shëndetësisë, njoftoi se 624 pasagjerë që u kthyen në Holandë nga Afrika e Jugut më 26 nëntor u testuan për COVID-19 në aeroportin Schiphol dhe 61 prej tyre rezultuan pozitivë.
Gjithashtu deklarohet se varianti Omicron është zbuluar tek 13 nga 61 persona të cilët rezultuan pozitivë në testin e COVID-19.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
