Në Shkup u mbajt ceremonia e ndarjes së çmimeve të konkursit të pikturës me temë "Ku të shkosh në Turqi, thesaret e Turqisë me Turkish Airlines" të organizuar nga Turkish Airlines (THY) midis shkollave në Maqedoninë e Veriut, raporton Anadolu.

Në ceremoninë e ndarjes së çmimeve për fituesit e konkursit të pikturës, të mbajtur në zyrat e THY-së në kryeqytetin Shkup, morën pjesë ambasadori i Turqisë në Shkup, Fatih Ulusoy, përfaqësues të institucioneve dhe organizatave turke në vend, anëtarë të jurisë së konkursit, mësues, nxënës dhe familjet e tyre.

Në fjalën e tij, ambasadori Ulusoy tha se konkursi i pikturës është një shembull i mirë i misionit të Turkish Airlines për të forcuar lidhjet kulturore midis shoqërive.

Duke kujtuar se Turkish Airlines nisi fluturime direkte nga Stambolli në Ohër në mars, Ulusoy tha se këto fluturime vazhdojnë të zhvillojnë marrëdhëniet midis dy vendeve në fushat e ekonomisë dhe turizmit, si dhe lidhjet midis popujve të tyre.

"Fëmijët tanë nga rajone të ndryshme të Maqedonisë së Veriut morën pjesë në këtë konkurs dhe demonstruan potencialin e Turqisë në fushën e turizmit me pikturat e vlefshme që realizuan. Secila prej veprave tuaja na tregon se sa të pasura janë talentet dhe imagjinata juaj në fushën e artit", tha Ulusoy.

Ambasadori Ulusoy theksoi gjithashtu se falë kësaj platforme të Turkish Airlines, ekziston një mundësi për të zbuluar dhe zhvilluar potencialin e artistëve të ardhshëm dhe përgëzoi nxënësit që morën pjesë në konkurs dhe fituan.

- 10 nxënës që janë të suksesshëm do të marrin një biletë avioni për në cilindo qytet në Turqi

Drejtoresha e THY-së për Shkupin, Ülker Şule Aksoy, deklaroi gjithashtu se ata arritën të përfshijnë afërsisht 5 mijë nxënës nga 500 shkolla nga i gjithë vendi përmes konkursit të pikturës që organizuan për herë të dytë këtë vit, me mbështetjen e Ministrisë së Arsimit dhe Shkencës së Maqedonisë së Veriut.

"Nuk mund t’i falënderojmë mjaftueshëm vëllezërit dhe motrat tona nga e gjithë Maqedonia e Veriut që na emocionuan dhe na lumturuan kaq shumë duke pikturuar thesaret unike të Turqisë së bukur. Edhe pse mund të mos kenë qenë asnjëherë në Turqi, në çdo pikturë që kemi pranuar, pamë çajin turk, simitet turke, macet që argëtohen në rrugët e Turqisë, shkurt, kulturën turke dhe shpirtin e Turqisë", tha Aksoy.

Si pjesë e këtij eventi, 10 nxënësve nga shkolla të ndryshme fillore dhe të mesme të vendit, të cilët morën pjesë në konkurs dhe fituan çmime, iu shpërndanë dhurata të ndryshme, përfshirë bileta avioni për në cilindo qytet në Turqi.

Ndryshe nga konkursi i mbajtur vitin e kaluar, këtë vit u ndanë çmime edhe dy nxënësve nga shkolla për persona me shikim të kufizuar që morën pjesë në konkurs.