Koronavirusi

Gjermania shënon rekord të ri me mbi 110.000 raste të reja me COVID-19

Instituti Robert Koch raporton 112.323 raste dhe 239 viktima gjatë 24 orëve të fundit

Ayhan Şimşek   | 19.01.2022
Gjermania shënon rekord të ri me mbi 110.000 raste të reja me COVID-19

Berlin

Gjermania raportoi më shumë se 110.000 raste të reja të koronavirusit në një ditë, një rekord i ri që nga fillimi i pandemisë dy vjet më parë, transmeton Anadolu Agency (AA).

Instituti Robert Koch (RKI), agjencia e kontrollit të sëmundjeve në vend, ka konfirmuar 112.323 raste me COVID-19 në 24 orët e fundit dhe 239 vdekje që ndërlidhen me koronavirusin.

Numri i personave që janë aktualisht të sëmurë me COVID-19 u rrit në 972.400, një nivel i ri në valën e pestë aktuale të pandemisë.

Varianti Omicron ka qenë faktori kryesor në rritjen e re të numrit të rasteve. Sipas raportit të fundit javor të RKI-së, varianti përbën të paktën 73 për qind të infeksioneve të reja në vend.

Pavarësisht rritjes së numrit të rasteve me koronavirus, shumica e rasteve kanë qenë të lehta deri më tani, duke mos qenë e nevojshme të shtrohen në spital.

Niveli i hospitalizimit në Gjermani ishte 3,17 për 100.000 banorë të martën, shumë më e ulët se shifrat e vërejtura në valët e mëparshme të pandemisë.

Sipas të dhënave zyrtare, numri i pacientëve me COVID-19 në njësitë e kujdesit intensiv vazhdoi të bjerë këtë javë.

Sidoqoftë, zyrtarët e shëndetit publik po paralajmërojnë se varianti Omicron po përhapet dukshëm më shpejt se variantet e mëparshme dhe mund të rëndojë sistemin e kujdesit shëndetësor nëse rastet vazhdojnë të rriten në mënyrë dramatike në ditët në vijim.

Qeveria gjermane ka rritur fushatën e saj të vaksinimit dhe po planifikon të administrojë vaksina përforcuese për të gjithë ata që kanë të drejtë brenda disa javësh për të frenuar përhapjen e variantit Omicron.

Sipas të dhënave zyrtare, rreth 72,8 për qind e popullsisë janë vaksinuar plotësisht kundër COVID-19 dhe gati 47,6 për qind prej tyre kishin marrë edhe vaksinat përforcuese që nga e marta.

Ekspertët thonë se vaksinat përforcuese janë të nevojshme kundër variantit Omicron, pasi imuniteti nga dozat fillestare fillon të dobësohet me kalimin e kohës. Një dozë e tretë ofron një nivel të lartë mbrojtjeje kundër variantit, sipas studimeve paraprake laboratorike.

Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
Tema relevante
Bu haberi paylaşın