Në qytetin Nice të Francës në kuadrin e masave për koronavirusin e ri (Covid-19) ndalohet dalja në rrugë pas orës 20.00, transmeton Anadolu Agency (AA).

Kryetari i bashkisë së qytetit Nice, Christian Estrosi, në një deklaratë për gazetën Journal du Dimanche tha se zbatimi i kësaj mase do të fillojë duke nisur që nga dita e sotme.

Pas mbylljes së marketeve dhe farmacive pas orës 20.00 askush nuk ka arsye që të dalë në rrugë përveç ekipeve të shëndetësisë, njoftoi Estrosi.

Në Francë që nga dita e martë janë vendosur kufizime në lëvizjen e lirë në të gjithë vendin përveç situatave të detyrueshme. Sipas kësaj, qytetarët mund të dalin jashtë vetëm për të shkuar në market, për të përballuar nevojat e detyrueshme, në farmaci ose spital, të shëtisin qentë dhe për një ecje të shkurtër.

Francezët kur dalin jashtë banesave të tyre, duhet të mbajnë me vete dokumentin e lejes së marrë nga faqja e ministrisë së brendshme dhe duhet t‘ia paraqesin policisë në rastin e kontrollit. Ato që nuk zbatojnë këtë rregull gjobiten me vlerën 135 euro.

Sipas të dhënave zyrtare numri i të vdekurve nga koronavirusi i ri (Cociv-19) në Francë ka shkuar në 372, ndërsa ai i rasteve të konfirmuara në 10.995.