Ekspertët paralajmërojnë: Ndryshimi klimatik detyron kafshët detare të ndryshojnë habitatet e tyre

Ndryshimet klimatike jo vetëm që kanë çuar në nxehtësi rekord në tokë, por edhe në det, gjë që sipas ekspertëve, ka bërë që kafshët e detit të ndryshojnë habitatet e tyre.

Profesori i biologjisë në Universitetin "Namik Kemal" në Tekirdag, Deniz Sirin tha për Anadolu se temperaturat e ujit të detit janë rritur me afërsisht 1.5 gradë Celsius në Mesdhe dhe 0.5 gradë në Detin e Zi në 100 vitet e fundit dhe se një ndryshim i tillë kërcënon ekosistemin detar.

Sirin tha se shpërndarja dhe ciklet e jetës së disa llojeve të peshqve kanë ndryshuar sepse janë bërë më të ndjeshëm ndaj sëmundjeve. "Raporti i Fondacionit Turk të Kërkimeve mbi ndryshimet klimatike dhe detet përmban shembuj mbresëlënës", tha ai.

Shfaqja e peshkut diellor nga Mesdheu jugor deri në Detin Marmara si dhe i iriqëve të detit që janë jokurrizorë në Egjeun verior dhe në detin Marmara është pasojë e ngrohjes globale.

Sirin tha se speciet nga Mesdheu filluan të përhapen gradualisht në Egjeun e Veriut, Marmara dhe madje edhe në Detin e Zi ndërsa uji ngrohej. Ai shtoi se rritja e temperaturave të detit po shkakton edhe lulëzimin e algave, të cilat kanë efekte të dëmshme për organizmat ujorë.

"Lulëzimi i algave ndodh kur substanca të tilla si azoti ose fosfori hyjnë në sistemin e ujit, duke shkaktuar rritje të tepruar të algave", tha Sirin duke shtuar se një dukuri e tillë bllokon rrezet e diellit dhe redukton nivelet e oksigjenit, duke penguar më tej mbijetesën e jetës ujore.

Lulëzimi i algave toksike konsiderohet si shkak për ngordhjet e fundit të luanëve të detit dhe delfinëve përgjatë brigjeve të plazheve të Kalifornisë jugore. Supozohet se krijesat e vogla si guacat, konsumojnë toksina përpara se të hahen nga gjitarët më të mëdhenj detarë.