Ugandë, të paktën 800 persona të vaksinuar me vaksinë false kundër COVID-19
“Disa njerëz të paskrupullt mashtruan popullatën me vaksina false për COVID-19 me synimin për të bërë para”, tha shefja e Njësisë së Monitorimit të Shëndetit, Dr. Wallen Naamara
Abuja
Të paktën 800 njerëz në Ugandë janë vaksinuar me vaksina false kundër koronavirusit të ri (COVID-19), njoftuan autoritetet e vendit, transmeton Anadolu Agency (AA).
Shefja e Njësisë së Monitorimit të Shëndetit, Dr. Wallen Naamara, tha në një deklaratë se rastet në rritje me COVID-19 në vend janë shqetësuese.
“Disa njerëz të paskrupullt mashtruan popullatën me vaksina false për COVID-19 me synimin për të bërë para”, tha Naamara.
Ajo theksoi se të paktën 800 njerëz u vaksinuan midis majit dhe qershorit, duke shtuar se disa njerëzve u është dhënë ujë në vend të vaksinës.
Naamara deklaroi se dy infermiere janë arrestuar në hetimin e nisur për këtë rast dhe se një mjek është në arrati.
Duke nënvizuar se vaksinat kundër COVID-19 janë falas në vend, Naamara i bëri thirrje publikut të qëndrojë larg vaksinave të tilla të paguara.
Sipas të dhënave të Ministrisë së Shëndetësisë të vendit të Afrikës Lindore, 91.355 raste me COVID-19 janë regjistruar deri më tani, prej të cilëve 2.483 persona kanë vdekur.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.