Më shumë se 100 mijë persona u shtruan në spital për shkak të goditjes nga nxehtësia në Japoni këtë verë, duke shënuar herën e parë që numri ka tejkaluar shifrën 100 mijë në vend, transmeton Anadolu.

Agjencia e Menaxhimit të Zjarrfikësve dhe Fatkeqësive të Japonisë tha të martën se 100.143 persona u dërguan në spitale me goditje nga nxehtësia në të gjithë Japoninë nga maji deri më 28 shtator, sipas transmetuesit "NHK World Japan".

Kjo shënoi herën e parë që shifra ka kaluar 100 mijë që nga viti 2015, kur periudha e anketës u zgjerua për të përfshirë majin. Numri i përgjithshëm i këtij viti tejkaloi rekordin prej 97.578 të regjistruar vitin e kaluar.

Një total prej 116 pacientësh vdiqën nga goditja e nxehtësisë këtë vit, ndërsa 36.448 të tjerë zhvilluan simptoma serioze që kërkonin shtrim në spital. Të moshuarit e moshës 65-vjeç e më lart përbënin 57.235 raste, më shumë se gjysma e totalit.

Muajin e kaluar, Agjencia Meteorologjike e Japonisë tha se vendi kishte regjistruar verën më të nxehtë të të gjitha kohërave këtë vit.

Agjencia tha se temperatura mesatare e vendit për qershorin, korrikun dhe gushtin ishte 2.36 gradë Celsius më e lartë se mesatarja 30-vjeçare deri në vitin 2020, duke shënuar nivelin më të lartë që nga fillimi i mbajtjes së të dhënave që nga viti 1898.