Kryeministri i Irlandës, Michael Martin, ka bërë thirrje për uljen e tensioneve në Lindjen e Mesme pas sulmeve të SHBA-së, ndaj tre objekteve bërthamore iraniane, transmeton Anadolu.

“Ekziston një nevojë urgjente për uljen e tensioneve, për dialog dhe diplomaci në Lindjen e Mesme”, shkroi Martin në platformën sociale X.

Duke theksuar se një zgjidhje e negociuar është rruga përpara, kryeministri irlandez theksoi se vendi i tij mbetet në kontakt të ngushtë me partnerët ndërkombëtar përpara takimit të Këshillit të BE-së.

“Irani duhet të mohojë pa mëdyshje zhvillimin e armëve bërthamore”, tha ai.

Situata në rajon u përkeqësua më tej pasi presidenti i SHBA-së, Donald Trump, herët në mëngjes njoftoi se forcat amerikane kryen sulme ajrore "shumë të suksesshme" në tre lokacione bërthamore iraniane, mes frikës në rritje të një konflikti më të gjerë në rajon.

Pas sulmeve të SHBA-së, Irani i bëri thirrje Këshillit të Sigurimit të OKB-së të mbajë një takim urgjent për të dënuar agresionin e SHBA-së dhe për t’i mbajtur përgjegjës ata që shkelin të drejtën ndërkombëtare.

Armiqësitë shpërthyen më 13 qershor kur Izraeli nisi sulme ajrore në disa vende në të gjithë Iranin, duke përfshirë objekte ushtarake dhe bërthamore, duke bërë që Teherani të nisë sulme hakmarrëse.

Që atëherë, autoritetet izraelite thanë se të paktën 25 persona janë vrarë dhe qindra të tjerë janë plagosur në sulmet iraniane me raketa, ndërkohë sipas autoriteteve iraniane, të paktën 430 persona janë vrarë dhe më shumë se 3.500 të tjerë plagosur në sulmet izraelite në Iran.