COVID-19, Merkel del nga karantina dyjavore
Zëdhënësi i Merkelit ka njoftuar se kancelarja gjermane kthehet në punë në Kancelarinë Federale pas karantinës dyjavore, pasi rezultoi negative në tre teste të koronavirusit
Berlin
Kancelarja gjermane, Angela Merkel ka dalë nga karantina e vetimponuar pasi disa herë ka rezultuar negative në testin e koronavirusit të ri (COVD-19), tha sot zëdhënësi i saj Steffen Seibert, raporton Anadolu Agency (AA).
Duke folur në një konferencë për media në Berlin, Seibert tha se Merkel ka përfunduar karantinën dyjavore në përputhje me rekomandimet e Institutit "Robert Koch", që është agjencia shtetërore për kontrollimin dhe parandalimin e sëmundjeve.
"Kancelarja po kthehet në punë sot në Kancelarinë Federale", tha Seibert, duke shtuar se Merkel do të vazhdojë të përdorë video-konferenca për takimet e planifikuara me zyrtarët vendorë dhe me homologët ndërkombëtarë.
Merkel të hënën ishte negative në testin e tretë të koronavirusit, ndërsa negative ishin edhe dy testet paraprake.
Kancelarja 65-vjeçare hyri në vetë-izolim më 22 mars, dy ditë pasi rezultoi pozitiv me COVID-19 mjeku i kancelares i cili i dha një vaksinë paraprake.
Gjermania është shteti i tretë më i goditur nga pandemia e koronavirusit në Evropë, pas Italisë dhe Spanjës.
Sipas statistikave të fundit të autoriteteve lokale, numri i vdekjeve në Gjermani sot është rritur në 1.111, ndërsa numri i përgjithshëm i rasteve të diagnostifikuara ka tejkaluar shifrën 85.000.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.