Presidentja e Kosovës, Vjosa Osmani, u ka bërë thirrje aleatëve ndërkombëtarë që t’i bëjnë presion të vazhdueshëm Serbisë, e cila, siç tha ajo, po mban të fshehur mijëra të zhdukur me dhunë, shqiptarë nga Kosova, transmeton Anadolu.

Osmani, e cila për ndër të 30 Gushtit - Ditës Ndërkombëtare të Personave të Zhdukur me Dhunë, bëri homazhe pranë lapidarit dedikuar për personat e zhdukur me dhunë, tha se në Kosovë mungojnë ende 1.584 qytetarë.

Presidentja kosovare tha se varret e hapura janë dëshmi e gjallë e krimeve të luftës dhe krimit te përsëritur nga regjimi gjenocidal serb, si dhe kujtesë e përditshme se drejtësia nuk është vënë ende në vend.

“Regjimi i Vuçiqit vazhdon të flejë mbi varreza masive, duke mbajtur peng zbardhjen e fatit të të zhdukurve. Është koha që partnerët ndërkombëtarë ta rrisin presionin mbi Serbinë, sepse vetëm zbardhja e fatit të të zhdukurve si dhe drejtësia mund t’u japin familjeve qetësinë që meritojnë”, theksoi Osmani.

Ajo shtoi se, për sa kohë sa, mijëra qytetarë mbesin të zhdukur, paqja mbetet e paplotë.