Ministri i Punëve të Jashtme i Maqedonisë së Veriut, Timço Mucunski, pas sulmeve amerikane ndaj objekteve bërthamore iraniane ka mbështetur veprimet e SHBA-së, transmeton Anadolu.

Në platformën sociale X, Mucunksi ka theksuar se Maqedonia e Veriut “në këtë moment përcaktues” riafirmon kundërshtimin e saj të vendosur ndaj “përhapjes bërthamore që kërcënon paqen rajonale dhe stabilitetin global”.

“Ne i njohim përpjekjet e SHBA-së për të adresuar këtë kërcënim dhe për të mbështetur sigurinë globale”, shkroi Mucunski.

Ai po ashtu theksoi se paqja kërkon frenim dhe diplomati të mbështetur nga vendosmëria.

Herët në mëngjesin e të dielës, SHBA-ja ka hedhur bomba shkatërruese bunkerësh në objektin bërthamor Fordow në Iran dhe ka kryer dhjetëra sulme me raketa nga nëndetëset në dy lokacione të tjera, duke shënjestruar programin bërthamor të Iranit.