Autoritetet shëndetësore në Kosovë kanë bërë të ditur se edhe 77 raste të reja janë diagnostikuar pozitive me koronavirusin e ri (COVID-19), duke e çuar në 1.833 numrin e përgjithshëm të të infektuarve, transmeton Anadolu Agency (AA).

Bazuar në të dhënat e fundit të Institutit Kombëtar të Shëndetësisë Publike në Kosovë (IKSHPK), nuk është regjistruar asnjë rast i ri që ka përfunduar me vdekje nga ky virus, e gjithashtu asnjë nga të kontrolluarit e fundit nuk ka rezultuar i shëruar nga koronavirusi.

Në 24 orët e fundit në Laboratorin e Mikrobiologjisë Molekulare janë testuar gjithsej 437 mostra të dyshuara me COVID-19, ndërsa nga data 8 shkurt e këtij viti deri më tani janë testuar gjithsej 19.749 mostra.

Rastet e reja pozitive janë raste kontakti nga komuna të ndryshme të Kosovës, nga të cilat me numër më të madh janë regjistruar në Komunën e Prishtinës.

Në Kosovë deri më tani nga 1.833 të infektuar me koronavirusi, 34 pacientë të cilët “kanë pasur edhe sëmundje të tjera shoqëruese” kanë vdekur, ndërsa 968 pacientë janë shëruar.