Shoqata e të Diplomuarve dhe Anëtarëve të Universitetit Ndërkombëtar Ballkanik (IBU) në Shkup shënoi njëvjetorin e themelimit të saj, me misionin për të forcuar lidhjet midis ish-studentëve dhe për të ruajtur vlerat dhe vizionin universal dhe shumëkulturor të universitetit, transmeton Anadolu.

Shoqata, e cila bashkon ish-studentët e universitetit që vepron në kryeqytetin e Maqedonisë së Veriut, ka organizuar gjatë vitit të parë një sërë aktivitetesh si takime, seminare dhe projekte sociale, me qëllim forcimin e bashkëpunimit dhe ndërtimin e një rrjeti aktiv të diplomuarish.

Një ndër prioritetet ka qenë edhe mentorimi i studentëve të rinj përmes lidhjes me të diplomuarit me përvojë, tha shoqata në një deklaratë.

Ajo theksoi se në periudhën e ardhshme, shoqata synon të zgjerojë rrjetin e saj të ish-studentëve në shkallë globale, të organizojë ngjarje ndërkombëtare dhe të ofrojë mbështetje në karrierë për të diplomuarit e rinj.

Rektori Prof. Dr. Lutfi Sunar, sipas deklaratës, është shprehur se IBU-ja nuk është vetëm një institucion arsimor, por “një familje e madhe” dhe shtëpi ku “miqësitë, kujtimet dhe idealet e përbashkëta lulëzojnë përsëri”.

“Si universitet, ne gjithmonë do ta mbështesim këtë iniciativë të vlefshme dhe do të vazhdojmë të rritemi së bashku”, ka thënë ai.

Ndërkaq, kryetari i Shoqatës, Suleyman Karakus, ka deklaruar se me krijimin e shoqatës vitin e kaluar është plotësuar një nevojë institucionale si për universitetin, ashtu edhe për ish-studentët.

“Jemi përpjekur të zgjerojmë ndikimin e shoqatës sonë përmes aktiviteteve të ndryshme gjatë gjithë vitit”, ka thënë ai, duke shtuar se qëllimi është të forcohet “në nivelin më të lartë komunikimi midis universitetit dhe të diplomuarve”.