Zonja e parë e Turqisë, Emine Erdoğan, ka marrë pjesë në ceremoninë e mbylljes së Forumit Ndërkombëtar të Familjes në Stamboll dhe ka vizituar disa nga stendat e ekspozitës, raporton Anadolu.

Erdoğan u prit në vendin e ngjarjes nga ministrja turke e Familjeve dhe Shërbimeve Sociale, Mahinur Özdemir Göktaş.

E shoqëruar nga ministrja Göktaş, ministra dhe politikëbërës të nivelit të lartë nga 27 vende, Erdoğan vizitoi stendat e ngritura në kuadër të forumit dhe u informua nga stafi rreth nismave të ndryshme të ekspozuara.

Ajo gjithashtu vizitoi një ekspozitë interaktive të përgatitur nga Ministria e Familjeve dhe Shërbimeve Sociale, të titulluar “Të gjitha familjet e lumtura janë njësoj” dhe ekzaminoi disa produkte të paraqitura në stenda.

Organizuar nën temën “Mbrojtja dhe forcimi i familjes përballë sfidave globale”, ngjarja dyditore mblodhi së bashku politikbërës, ekspertë dhe përfaqësues të shoqërisë civile për të eksploruar rolin në zhvillim të familjes dhe kërcënimet me të cilat përballet familja në shoqërinë moderne.

Forumi organizohet nën kujdesin e Ministrisë së Familjes dhe Shërbimeve Sociale të Turqisë në kuadër të nismës së vendit “2025-ta viti i familjes”. Anadolu është partner global komunikimi i forumit.

Ngjarja paraqiti një seancë ministrore dhe katër panele diskutimi, përkatësisht “Shumë përfituese: Kostoja e sfidave globale për individët, familjet dhe shoqërinë”, “Midis trillimit dhe realitetit: Familja në kulturë, art dhe media”, “Të qenurit familje në epokën e ekraneve” dhe “Miti i mbipopullimit: Si kontribuoi një agjendë globale në rënien e popullsisë”.