Turqia ka emëruar ambasadorin Mehmet Gulluoglu si koordinator të ndihmës humanitare për Palestinën për të siguruar ofrimin dhe koordinimin efektiv të ndihmës humanitare të vendit në Gaza, thanë burime diplomatike, transmeton Anadolu.

Turqia po mobilizon plotësisht burimet e saj për të përshpejtuar rrjedhën e ndihmës humanitare në Gaza, për të krijuar strehimore të përkohshme për civilët e zhvendosur dhe për të kontribuar në rindërtimin e enklavës së shkatërruar nga lufta, shtuan burimet.

Si pjesë e kësaj përpjekjeje, ambasadori Gulluoglu dhe ekipi i tij shoqërues arritën në Gaza.

Misioni i tij përfshin mbikëqyrjen e koordinimit dhe monitorimit të aktiviteteve humanitare të Turqisë në terren, duke siguruar bashkëpunim të ngushtë me institucionet përkatëse, autoritetet lokale dhe partnerët ndërkombëtarë.

Koordinatori do të vlerësojë nevojat prioritare dhe materialet e kërkuara humanitare në Gaza; do të punojë në koordinim me agjencitë e OKB-së dhe do të mbështesë aktivitetet e tyre të vazhdueshme në rajon; do të lehtësojë ofrimin efikas dhe të saktë të ndihmës nga Turqia tek ata që kanë nevojë në Gaza në bashkëpunim me institucionet turke aktive në terren; do të zhvillojë konsultime me autoritetet lokale në lidhje me ofrimin e ndihmës përmes Egjiptit dhe Jordanisë dhe do të forcojë mbështetjen mjekësore të Turqisë për Gazën, përfshirë evakuimin e pacientëve për trajtim.

- Përpjekjet humanitare të Turqisë për Gazën

Turqia ka një traditë të gjatë të ndihmës humanitare, duke ofruar ndihmë të shpejtë dhe të paanshme për ata që preken nga konfliktet, fatkeqësitë natyrore dhe zhvendosjet masive, pavarësisht nga gjuha, feja, raca apo gjinia.

E vendosur në një rajon të prekur shpesh nga krizat, Turqia ka ofruar ndihmë të konsiderueshme për zonat fqinje, veçanërisht për vende si Palestina dhe Siria. Që nga fillimi i sulmeve të Izraelit, Turqia ka qenë ndër vendet kryesore që ofrojnë ndihmë humanitare në Gaza. Nga tetori i vitit 2023 e tutje, vendi ka dërguar afërsisht 102 mijë tonë furnizime humanitare në Gaza nga deti dhe ajri.

Armëpushimi i arritur së fundmi në enklavë ka krijuar një mundësi për të ofruar ndihmë në mënyrë më të qëndrueshme dhe në sasi më të mëdha. Brenda këtij kuadri, Turqia dërgoi të martën një anije që transportonte rreth 865 tonë furnizime me ndihmë humanitare nga porti i Mersinit në portin El Arish të Egjiptit.