Turqia arreston një detektiv privat të akuzuar për spiunazh për Mossad-in
I dyshuari ndryshoi emrin pas problemeve financiare, themeloi një agjenci detektivësh përpara se të kontaktonte me inteligjencën izraelite
Ankara
Sipas burimeve të sigurisë, Turqia arrestoi sot një detektiv privat të akuzuar se punonte për agjencinë kombëtare të inteligjencës së Izraelit, Mossad, raporton Anadolu
Organizata Kombëtare e Inteligjencës e Turqisë (MIT), tha se i dyshuari, i identifikuar si Serkan Çiçek, u mor në paraburgim gjatë operacionit të koduar "Metron Activity".
Zyrtarët e sigurisë thanë se ai kishte punuar për Mossad-in dhe ishte në kontakt me Faysal Rasheed, një anëtar i Qendrës së Operacioneve Online të Izraelit.
Çiçek dyshohet se pranoi se kishte kryer mbikëqyrje në Stamboll, me kërkesë të Rasheed, ndaj një aktivisti palestinez që kundërshton politikat e Izraelit në Lindjen e Mesme.
- I dyshuari mori pagesë në kriptovaluta
Sipas inteligjencës turke, Çiçek, emri i vërtetë i të cilit është Muhammet Fatih Keles, ndryshoi emrin e tij pasi ra në borxhe të mëdha dhe la karrierën e tij në biznes për të themeluar një firmë private, Pandora Detective Agency, në vitin 2020.
Thuhet se ai ka punuar me Musa Kus, i cili u dënua me 19 vjet burg për spiunazh për Izraelin, dhe me avokatin Tugrulhan Dip, të dy të cilët u shpallën fajtorë për shitjen e të dhënave personale nga të dhënat publike te detektivët për qëllime fitimi.
Zyrtarët thanë se Çiçek tërhoqi vëmendjen e Mossad-it pasi nisi punën e tij si detektiv. Më 31 korrik, Rasheed dyshohet se e kontaktoi atë nëpërmjet WhatsApp, duke u prezantuar si punonjës i një firme të huaj ligjore.
Rasheed më pas i ngarkoi Çiçek-ut detyrën e kryerjes së një misioni katër-ditor mbikëqyrjeje ndaj një aktivisti palestinez që jetonte në Basaksehir, në periferi të Stambollit. Çiçek thuhet se u pagua 4.000 dollarë në kriptovaluta më 1 gusht për të kryer detyrën.
Çiçek mësoi se objektivi ishte një aktivist palestinez pasi kërkoi emrin në internet. Pavarësisht se dinte se bashkëpunëtori i tij Kus ishte burgosur për spiunazh për Izraelin, ai e pranoi punën.
Autoritetet thanë se Çiçek vizitoi adresën e dhënë nga Rasheed, por nuk mundi ta gjente objektivin. Ai hyri në kompleksin e banesave më 1-2 gusht me pretekstin se po kërkonte një apartament me qira dhe kreu zbulime, por nuk arriti të mblidhte informacionin që Mossad kishte kërkuar.
Më 3 gusht, Rasheed ndërpreu kontaktin, sipas zyrtarëve.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
