Autoritetet turke kanë arrestuar një avokat të akuzuar për shitje informacioni te detektivët që punojnë për agjencinë e inteligjencës izraelite Mossad, raporton Anadolu.

Sipas burimeve të sigurisë, Tugrulhan Dip u arrestua në Stamboll në një operacion të përbashkët nga Organizata Kombëtare e Inteligjencës (MIT), Zyra e Kryeprokurorit Publik të Stambollit dhe Departamenti i Policisë kundër Terrorizmit.

Dip akuzohet se ka mbështetur Serkan Çiçek, një detektiv privat i kapur dhe i arrestuar gjithashtu, si dhe ka punuar me disa detektivë të tjerë të përfshirë në spiunazh për Izraelin. Një nga këta detektivë, përkatësisht Musa Kus, u dënua me 19 vjet burg për aktivitete spiunazhi.

Dip u kishte siguruar detektivëve të dhëna personale nga të dhënat publike për përfitime financiare dhe i kishte shitur informacionet në të cilat kishte qasje përmes një paneli që kishte krijuar, një sistem i paligjshëm hetimi i të dhënave.

Më herët gjatë ditës, thanë burimet, autoritetet turke në një operacion të përbashkët me prokurorët dhe policinë e Stambollit arrestuan detektivin privat Çiçek, i akuzuar se punonte për Mossadin. Operacioni ishte koduar "Aktiviteti Metron".

Zyrtarët e sigurisë thanë se ai kishte punuar për Mossadin dhe ishte në kontakt me Faysal Rasheedin, një anëtar i Qendrës së Operacioneve Online të Izraelit.

Çiçek dyshohet se pranoi se ka kryer mbikëqyrje në Stamboll, me kërkesë të Rasheedit, ndaj një aktivisti palestinez që kundërshton politikat e Izraelit në Lindjen e Mesme.