Në Stamboll ka filluar Panairi i 17-të Ndërkombëtar i Industrisë së Mbrojtjes (IDEF 2025), raporton Anadolu.

Panairi i 17-të Ndërkombëtar i Industrisë së Mbrojtjes (IDEF 2025), i organizuar nga Ministria e Mbrojtjes Kombëtare të Turqisë, me mbështetjen e Presidencës së Industrive të Mbrojtjes, nën menaxhimin dhe përgjegjësinë e Fondacionit të Forcave të Armatosura Turke dhe i organizuar nga KFA Fair Organization Inc., po mbahet në Qendrën e Panaireve të Stambollit (IFM).

Këtë vit, ministra dhe mbi 120 zëvendësministra, shefa të shtabeve të përgjithshme, komandantë forcash dhe krerë delegacionesh nga 33 vende do të marrin pjesë në këtë ngjarje, për të cilën Anadolu është "Partneri Global i Komunikimit". Më shumë se 400 kompani ndërkombëtare do të ekspozojnë produktet e tyre në "IDEF 2025", ku ekspozuesit nga 44 vende do të kenë stendat e tyre.

Seksioni i automjeteve tokësore të panairit përfshin tanke kryesore beteje, automjete të blinduara luftarake, sisteme të luftës elektronike, raketa, raketa balistike taktike, raketa të mbrojtjes ajrore dhe automjete tokësore pa pilot (UGV).

Seksioni i avionëve përfshin produkte të tilla si platforma me krahë të fiksuar, sisteme të mbrojtjes ajrore, teknologji të luftës elektronike, satelitë, mjete ajrore pa pilot dhe motorë avionësh.

Seksioni i mjeteve detare të panairit përfshin anije luftarake dhe mbështetëse, platforma me krahë fiks dhe rrotullues, mjete sipërfaqësore dhe nënujore pa pilot (USAV) dhe sisteme komande, kontrolli dhe komunikimi. Teknologjitë në fushën e sigurisë dhe logjistikës do t'u prezantohen gjithashtu vizitorëve në panair.

Këtë vit, "IDEF 2025" do të organizojë ngjarje në katër lokacione, duke përfshirë Qendrën kryesore të Panaireve të Stambollit, si dhe Aeroportin Atatürk, Marinën Ataköy dhe Qendrën e Kongreseve WOW. Dy ditët e fundit të "IDEF 2025" do të jenë të hapura për publikun.

Panairi do të përfundojë më 27 korrik.