Shefi i shërbimit turk të inteligjencës (MIT), Ibrahim Kalin, u takua sot me një delegacion të grupit palestinez Hamas në Stamboll për të diskutuar marrëveshjen e armëpushimit në Gaza, transmeton Anadolu.

Delegacioni i Hamasit u udhëhoq nga anëtari i Byrosë Politike të Hamasit dhe kreu i ekipit të negociatave, Khalil al-Hayya.

Gjatë takimit, delegacioni i Hamasit shprehu mirënjohjen ndaj Turqisë, veçanërisht ndaj presidentit Recep Tayyip Erdogan, për rolin dhe përpjekjet e saj si ndërmjetës dhe garantues në arritjen dhe monitorimin e armëpushimit.

Delegacioni i Hamasit gjithashtu tha se është i përkushtuar ndaj marrëveshjes së armëpushimit, pavarësisht shkeljeve të kryera nga Izraeli gjatë gjithë procesit të armëpushimit.

Në takim gjithashtu u trajtuan hapat e nevojshëm për të siguruar funksionimin e qetë të procesit të armëpushimit dhe mënyrat për të kapërcyer problemet ekzistuese.

Palët diskutuan gjithashtu rrugët që duhet ndjekur për zbatimin e fazave të ardhshme të planit të armëpushimit.

Gjatë takimit u ofrua edhe një informim mbi ndihmat humanitare të Turqisë për Gazën dhe përpjekjet e saj për t’i dhënë fund tragjedisë humanitare.

Takimi përfshiu gjithashtu diskutime mbi përpjekjet e vazhdueshme me organizatat ndërkombëtare për të siguruar rrjedhje më të mëdha ndihmash.