Retë e rralla të tipit Mammatus janë shfaqur mbrëmë në qiellin mbi rrethin Fethiye në provincën Mugla të Turqisë, raporton Anadolu.

Retë mammatus ndriçuan nga drita e fundit e diellit që perëndonte pas një shiu të lehtë në Fethiye, duke krijuar pamje mahnitëse për banorët dhe turistët në zonë, të cilët ndaluan për të fotografuar qiellin që dukej sikur ishte pikturuar me dritë dhe hije.

Këto re janë formacione në formë valëzimesh që varen poshtë bazës së reve dhe formohen kur ajri i ftohtë brenda resë zhytet në ajrin më të ngrohtë poshtë saj.

Fethiye, një destinacion i njohur turistik në rivierën turke, shpesh përjeton dukuri të tilla pas periudhave me lagështi të lartë dhe ndryshime të menjëhershme të temperaturës.