Njerëzve shtëpitë e të cilëve janë dëmtuar në zjarret në Turqi do t'u jepen shtëpi të reja brenda një viti më së voni, tha ministri i Jashtëm turk, Mevlüt Çavuşoğlu, raporton Anadolu Agency (AA).

“Qeveria gjithashtu ka qenë e shpejtë për të ofruar ndihmë financiare, me të paktën 10.000 lira turke nga deri në 50.000 lira turke të dhëna tashmë për familjet e prekura”, u tha Çavuşoğlu gazetarëve gjatë një vizite inspektuese në rrethin Manavgat të Antalya-s së bashku me Ersin Tatar, presidentin e Republikës Turke të Qipros Veriore (TRNC).

Ai tha se përpjekjet po vazhdojnë për të shuar flakët në tri pika në Antalya.

“Pengesa më e madhe tani është era”, tha ai, duke theksuar se të gjitha burimet po përdoren në operacionet e intervenimit.

Çavuşoğlu tha se ekipet po kryejnë vlerësimin e dëmeve në rajon dhe autoritetet do të bëjnë gjithçka në fuqinë e tyre për të përmbushur kërkesat e të gjithë qytetarëve të prekur nga zjarret.

Deri më tani, Turqia ka vënë nën kontroll 160 nga 174 zjarre pyjore që nga java e kaluar, sipas një deklarate të fundit nga Drejtoria e Pyjeve e vendit.

Zjarret kanë shpërthyer në 39 nga 81 provincat e Turqisë, sipas drejtorisë, ndërkohë që 14 zjarre ende vazhdojnë në pesë provinca në Turqinë jugore dhe jugperëndimore, Antalya, Muğla, Aydın, Isparta dhe Denizli.