Presidenti turk, Recep Tayyip Erdoğan, tha se shpreson që hapat e rëndësishëm të ndërmarrë në rrugën drejt një Turqie pa terrorizëm “do të sjellin rezultate pozitive”, pasi një grup terroristësh të PKK-së dorëzuan armët sot, transmeton Anadolu.

Në një deklaratë për X, Erdoğan uroi sukses nga Zoti në rrugën për të garantuar “sigurinë e kombit tonë, paqen e popullit tonë dhe vendosjen e paqes së qëndrueshme në rajonin tonë”.

Grupi i terroristëve të PKK-së dorëzoi armët dhe i shkatërroi ato në provincën Sulaymaniyah të Irakut verior.

30 terroristët, përfshirë 15 gra, shkatërruan armët e tyre duke i hedhur në një kazan të madh që digjej.

Në maj, grupi terrorist vendosi të shpërbëhej dhe të linte armët. Njoftimi pasoi një deklaratë të shkurtit nga udhëheqësi i burgosur i PKK-së, Abdullah Oçalan, i cili bëri thirrje për shpërbërjen e organizatës dhe grupeve të lidhura me të, duke kërkuar përfundimin e fushatës së armatosur që ka zgjatur për më shumë se katër dekada.

Në fushatën e saj 40-vjeçare terroriste kundër Turqisë, PKK-ja – e listuar si organizatë terroriste nga Turqia, SHBA-ja dhe BE-ja – ka qenë përgjegjëse për vdekjen e mbi 40.000 njerëzve, përfshirë gra, fëmijë, foshnja dhe të moshuar.