Në Turqi do të nisë me punë laboratori i parë antropologjik i ADN-së

Në Turqi të premten do të nisë me punë "laboratori i parë antik për ADN", që do të kryejë studime shkencore në mbetjet e mumifikuara të civilizimeve të Anadollit të vjetra 10.000-15-000 vjet, raporton Anadolu Agency (AA).

Laboratori i antropologjisë molekulare në Universitetin Hacettepe në Ankara do të ekzaminojë sëmundjet e trashëguara dhe sëmundjet bakteriale të njerëzve dhe kafshëve të lashta.

ADN janë blloqe të rëndësishme në ndërtimin e jetës që përmbajnë informata trashëgimie që transferohen në gjeneratën e ardhshme, thotë për AA profesori i antropologjisë, Selim Erdal.

Duke theksuar se ekziston një numër i vogël i institucioneve të këtilla në botë, Erdal tha se ndërtesa e laboratorit ishte dizajnuar enkas për mbrojtjen e ADN-së nga ndotjet e jashtme të organizmave të gjalla, të tilla si bakteret dhe kërpudhat.

Erdal tha se analizat e ADN-së gjithashtu do të ndihmonin në "zbardhjen e historisë, marrëdhënieve, lëvizjeve dhe kulturës" së komuniteteve njerëzore dhe civilizimeve që kanë jetuar në Anadoll dhe zonat përreth në 10.000 deri në 15.000 vitet e fundit.

"Ne do të konfirmojmë informatat e marra nga të dhënat arkeologjike me studimet e ADN-së dhe do të zbulojmë pjesët e panjohura të historisë", tha ai.

Erdal gjithashtu tha se studimet nuk do të përkufizohen vetëm në Turqi, por gjithashtu do të kryhen edhe në rajone tjera, sidomos në vendet fqinje.