Ministri turk i Drejtësisë, Yılmaz Tunç ka dënuar sulmin ndaj Flotiljes Globale "Sumud" që ishte nisur drejt Gazës dhe ka bërë thirrje për lirimin e aktivistëve të ndaluar nga flotilja, raporton Anadolu.

Duke folur në një aktivitet në provincën perëndimore Edirne, Tunç tha se tragjedia humanitare në Palestinë ka vazhduar. Ai theksoi se bota ka dëshmuar sulmin e Izraelit ndaj Flotiljes, një mision që ka për qëllim të ofrojë ndihmë për fëmijët, gratë dhe njerëzit e tjerë të cenueshëm në Palestinë, teksa synon të ekspozojë shkeljet e të drejtave të njeriut para komunitetit ndërkombëtar.

Tunç bëri thirrje për lirimin e menjëhershëm të aktivistëve të ndaluar. "Ju i keni shkaktuar vuajtje të mëdha popullit të Palestinës duke shkelur ligjin ndërkombëtar dhe të drejtat themelore të njeriut. Ju vazhdoni të kryeni akte gjenocidi në sy të botës", tha ai.

Ministri i Drejtësisë tha se trajtimi i aktivistëve të Flotiljes nga Izraeli dhe ajo që vazhdon të bëjë në Palestinë përbëjnë krime kundër njerëzimit.

"Që nga 7 tetori i vitit 2023, Izraeli ka kryer gjenocid në Gaza, duke vrarë gra dhe fëmijë dhe duke vazhduar të kryejë krime kundër njerëzimit. Kjo nuk është diçka që filloi dy apo dy vjet e gjysmë më parë. Gjatë 100 viteve të fundit, Izraeli ka pushtuar tokat palestineze dhe ka zbatuar një politikë gjenocidi atje", tha Tunç.

Organizatorët e flotiljes thanë se forcat detare izraelite sulmuan 42 anije të Flotiljes që nga e mërkura vonë dhe ndaluan më shumë se 450 aktivistë.

Flotilja, që mbante kryesisht ndihmë humanitare dhe furnizime mjekësore, u nis në fund të gushtit për të thyer bllokadën e Izraelit ndaj Gazës. Kjo ishte përpjekja më e madhe në vite për të arritur në enklavë, e cila ka qenë nën bllokadë për gati 18 vjet.

Izraeli e shtrëngoi më tej rrethimin në muajin mars, duke mbyllur të gjitha kalimet kufitare dhe duke bllokuar ushqimin, ilaçet dhe ndihmën, duke e çuar Rripin e Gazës drejt urisë pavarësisht kamionëve të ndihmës që grumbulloheshin në kufijtë e saj.

Që nga tetori i vitit 2023, ushtria izraelite ka vrarë në Rripin e Gazës të paktën 66.200 palestinezë, shumica prej tyre gra dhe fëmijë. Bombardimet e pamëshirshme e kanë lënë enklavën pothuajse të pabanueshme, me urinë dhe sëmundjet që po përhapen me shpejtësi.