Në rrethin Atakum të qytetit turk Samsun, një çift sipërmarrës i rikthen klientët në fëmijëri duke u ofruar mundësinë të luajnë me makineri miniaturë në një kantier ndërtimi të krijuar brenda kafenesë që kanë hapur.

Çifti Omer Kaan Donum dhe Nesligul Misirligul Donum lanë punët e tyre në korporatë dhe nisën rrugën për të hapur një biznes të ndryshëm.

Duke realizuar një projekt interesant, ata krijuan një kantier ndërtimi miniaturë në kafenenë e tyre.

Klientët, teksa shijojnë kafenë, kanë mundësinë të luajnë me makineri ndërtimi lodër me telekomandë dhe automjete 4x4. Lodrat tërheqin edhe vëmendjen e fëmijëve.

Në kafenenë që tërheq veçanërisht interesin e fëmijëve dhe familjeve, klientët përpiqen të përfundojnë një pistë duke marrë role të caktuara në zona të përcaktuara.

Omer Kaan Donum për Anadolu tha se kanë realizuar një projekt që e kishin ëndërruar prej kohësh dhe synojnë të ofrojnë një përvojë ndryshe për pjesëmarrësit përmes pistës së krijuar me makineri miniaturë.

Donum theksoi se lodrat janë projektuar në mënyrë të ngjashme me parimet e punës së makinerive reale të ndërtimit dhe se përdoruesit kënaqen shumë. Ai tregoi se që në fëmijëri i pëlqente shumë të luante me lodra të tilla.

"Në fakt kjo ishte ëndrra ime e fëmijërisë. Edhe kur isha fëmijë më pëlqente shumë të luaja me këto lodra", tha ai.

Ai shtoi se megjithëse janë të rinj në këtë biznes, kanë marrë reagime shumë pozitive nga klientët.

"Mësojnë të luajnë në mënyrë më të qetë"

Ndërkaq, Nesligul Misirligul Donum tha se për një kohë të gjatë kanë hulumtuar se çfarë mund të bënin dhe kanë parë shembuj nga jashtë vendit. Ajo theksoi se ky është një ambient edukues edhe për fëmijët.

"Kemi automjete 4x4 me telekomandë dhe makineri ndërtimi. Këto janë versione në shkallë të vogël të automjeteve reale dhe janë mjaft të fuqishme. Këtu u drejtohemi të gjithëve mbi moshën 10 vjeç. Ata mësojnë të luajnë dhe të luajnë më qetë, sepse këto automjete nuk lejojnë përdorim të shpejtë. Për të rriturit është një aktivitet shumë i mirë si për t'u kthyer në fëmijëri, për një ndjenjë nostalgjie, ashtu edhe për të çlodhur mendjen", shpjegoi ajo.

Një nga klientët, Hakan Ozturk, tha se kishin ardhur nga Antalya për vizitë familjare dhe se kafeneja u tërhoqi vëmendjen sapo e panë.