Ministri turk i Transportit dhe Infrastrukturës, Abdulkadir Uraloglu, ka bërë të ditur se negociatat e gjata të aviacionit midis Turqisë dhe Hungarisë kanë përfunduar me një marrëveshje të re shërbimesh ajrore që do të rrisë ndjeshëm fluturimet e pasagjerëve dhe mallrave.

Duke folur për Anadolu, ministri Uraloglu tha se të drejtat e fluturimit të pasagjerëve pothuajse do të trefishohen nga 35 në javë në 98 në fazën e parë, ndërsa të drejtat e fluturimit të mallrave do të dyfishohen nga shtatë në 14 në javë.

16 marrëveshje bashkëpunimi në fushat diplomatike, ekonomike dhe kulturore u nënshkruan gjatë vizitës në Turqi këtë të hënë të kryeministrit hungarez, Viktor Orban,. Marrëveshja e shërbimeve ajrore u nënshkrua nga Uraloglu dhe ministri hungarez i Punëve të Jashtme dhe Tregtisë së Jashtme, Peter Szijjarto.

Uraloglu tha se marrëveshja e re do të zëvendësojë një marrëveshje të transportit ajror të nënshkruar në vitin 1966, pasi u miratua nga parlamenti turk.

“Kjo është një marrëveshje e rëndësishme pasi është marrëveshja e parë e transportit ajror që Turqia nënshkroi me një shtet anëtar të BE-së në një kohë të gjatë. Kjo marrëveshje është produkt i rreth 2 vjet e gjysmë negociatash të kujdesshme dhe do t'i nënshtrohet procesit të miratimit nga parlamenti turk”, tha ministri turk.

Ai tha se marrëveshja heq kufizimet e frekuencës dhe destinacionit, duke u lejuar transportuesve turq të rrisin fluturimet për në Hungari dhe duke u mundësuar transportuesve hungarezë dhe të tjerë të BE-së të operojnë fluturime për në Turqi nëse plotësojnë kushtet e kërkuara.

“Kur marrëveshja të hyjë në fuqi, kapaciteti i transportit të pasagjerëve dhe mallrave midis Turqisë dhe Hungarisë do të zgjerojë më tej vëllimin e tregtisë, duke mbështetur potencialin e ndërsjellë turistik, duke kontribuar në qasjen në ndërveprimet kulturore dhe ekonomike midis dy vendeve”, shtoi ai.