Presidenti i Turqisë, Recep Tayyip Erdoğan, ka uruar kryetarin e Lëvizjes Vetëvendosje, Albin Kurti, për suksesin e arritur në zgjedhjet e parakohshme parlamentare të 14 shkurtit, transmeton Anadolu Agency (AA).

Nëpërmjet një letre dërguar Kurtit, Erdoğan ka uruar që rezultati zgjedhor të jetë në dobi të gjithë popullit kosovar.

Erdoğan tha se shpreson që në procesin e formimit të qeverisë, të merren parasysh edhe prioritetet dhe pritjet e komunitetit turk të Kosovës.

“Në këtë kontekst, jam i lumtur që Partia Demokratike Turke e Kosovës (KDTP) ka fituar dy vendet e ndara për komunitetin turk. Në formimin e qeverisë, ashtu sikurse në të kaluarën, nuk kam dyshim që do të bashkëpunoni me KDTP-në”, ka thënë Erdoğan.

Presidenti turk ka thënë se edhe në të ardhmen, Turqia do të vazhdojë të jetë në solidaritet me popullin e Kosovës.

“Po ashtu, u gëzova që mësova qëndrimin tuaj për rishqyrtimin e zotimit për hapjen e ambasadës së Kosovës në Kuds në rast të ardhjes së partisë suaj në qeveri. Jam i mendimit se do të ishte e dobishme që Kosova të shmangë një hap të tillë që mund të jetë shumë i dëmshëm”, ka theksuar Erdoğan në letrën e tij.