E vendosur në shpatet jugore të Maleve Canik, Amasya tërheq vëmendjen e turistëve vendas dhe të huaj me historinë e saj të lashtë, trashëgiminë kulturore dhe bukuritë natyrore, raporton Anadolu.

Me një histori rreth 8.500-vjeçare, qyteti konsiderohet një nga vendbanimet më të rëndësishme në Anadoll, me një trashëgimi shumështresore që shtrihet nga hititët deri në periudhën osmane. Straboni, një nga gjeografët e parë të historisë, njihet si i lindur në këtë qytet, i cili në të kaluarën është përmendur me emrat "Hakmish" dhe "Amaseia".

Mali Harshena dhe Varret mbretërore shkëmbore të Pontit, të përfshira në Listën e Përkohshme të Trashëgimisë Botërore të UNESCO-s, janë ndër zonat më tërheqëse historike të qytetit. Në kohën e Mbretërisë së Pontit, kur Amasya ishte kryeqytet, këto varre monumentale të gdhendura në shkëmb në shpatin jugor të malit Harshena përfaqësojnë shembuj të veçantë të traditës së varrimeve në shkëmb.

Shtëpitë Yaliboyu të rreshtuara përgjatë lumit Yesilirmak plotësojnë siluetën e qytetit me arkitekturën e tyre osmane. Disa prej këtyre ndërtesave tradicionale sot përdoren për turizëm, duke u ofruar vizitorëve mundësinë të përjetojnë gjurmët e së kaluarës.

Struktura që dallohen me trashëgiminë osmane

Muzeu Sehzadeler, i vendosur në një nga qytetet ku janë rritur princat osmanë, tërheq vizitorë me statujat dhe veshjet e sulltanëve të asaj kohe.

Kompleksi i Sultan Bayezid të 2-të, me xhaminë, medresenë dhe imaretin e saj, konsiderohet një nga shembujt e rëndësishëm të arkitekturës osmane, ndërsa drurët shekullorë në oborr i japin kompleksit një identitet të veçantë.

Nga periudha selxhuke, Gokmedrese dallohet për punimin e gurit dhe detajet arkitektonike.

Trashëgimia kulturore dhe historia e shkencës

Muzeu Ferhat ile Sirin Asiklar u prezanton vizitorëve historitë legjendare të dashurisë, ndërsa Kanali i Ujit Ferhat, që daton nga antikiteti, është një shembull i rëndësishëm inxhinierik për furnizimin me ujë të qytetit.

Muzeu i Historisë së Kirurgjisë dhe Mjekësisë Sabuncuoglu Serefeddin njihet si një nga qendrat e para në Anadoll ku është praktikuar trajtimi me muzikë dhe tërheq vëmendje me kontributin e tij në historinë e mjekësisë.

Kalaja e Amasya-s, e vendosur mbi malin Harshena, ka mbijetuar deri më sot përmes restaurimeve të ndryshme dhe dominon qytetin me pozicionin e saj strategjik.\

Shpella Aynali, e njohur si një nga shembujt më të punuar të varreve në shkëmb, është një tjetër pikë e rëndësishme vizite si nga aspekti historik ashtu edhe ai fetar.

Ndërsa Parku Natyror i Liqenit Boraboy, me pamjen e tij të gjelbër smeraldi dhe pyjet përreth, është një destinacion i preferuar për adhuruesit e natyrës.

Me strukturat historike, zonat natyrore dhe trashëgiminë e pasur kulturore, Amasya vazhdon të ofrojë përvoja të ndryshme për vizitorët gjatë gjithë vitit.