Aeroporti “Sabiha Gokcen”, anën aziatike të Stambollit, shërbeu 44,2 milionë pasagjerë gjatë periudhës janar–nëntor, duke thyer rekordin e vitit të kaluar prej 41,4 milionësh, raporton Anadolu.

Ministri turk i Transportit dhe Infrastrukturës, Abdulkadir Uraloglu, tha sot se pista e re, e hapur në dhjetor 2023 për të mundësuar uljen e aeroplanëve me trup të gjerë, kontribuoi në këtë rekord. Deklarata u publikua në përvjetorin e dytë të vënies në funksion të kësaj piste.

Uraloglu theksoi se rruga e rrotullimit, platformat për aeroplanë me kapacitet të lartë dhe për kargo, kulla e kontrollit të trafikut ajror dhe infrastruktura supermoderne, së bashku me pistën e re, kanë rritur ndjeshëm kapacitetin e trafikut ajror të aeroportit “Sabiha Gokcen”.

Në vitin 2023, gjatë janar–nëntorit, u shërbyen 33,7 milionë pasagjerë në fluturimet vendore dhe ndërkombëtare.

“Numri i pasagjerëve u rrit me 31 për qind në 11-mujorin e vitit 2025 krahasuar me periudhën para se pista e dytë të futej në shërbim në vitin 2023”, tha ai.

“Vetëm në 11 muaj kemi kaluar numrin rekord prej 41,4 milionë pasagjerësh të vitit 2024 në tërësi”, shtoi ai.

Uraloglu tha se 208.643 avionë u ngritën dhe u ulën gjatë periudhës janar–nëntor 2023, ndërsa kjo shifër u rrit me 20 për qind në 250.538 në të njëjtën periudhë të këtij viti. “Në vitin 2024 në total, kjo shifër ishte 242.612”, përfundoi ai.