Ministria turke e Mbrojtjes: Tre anije të tjera me drithë nisen nga Ukraina
Eksportet e grurit nga portet ukrainase të Detit të Zi kryhen nën vëzhgimin e Qendrës së Përbashkët Koordinuese në Istanbul
Ankara
Tre anije të tjera janë nisur nga portet ukrainase sipas marrëveshjes së eksportit të grurit të Istanbulit, njoftoi sot Ministria e Mbrojtjes Kombëtare Turke, transmeton Anadolu Agency (AA).
Sipas ministrisë, e cila nuk bëri të ditur pikat e nisjes apo destinacionet e anijeve, të paktën tre anije të tjera që transportonin grurë janë nisur nga portet e Ukrainës mëngjesin e sotëm.
Turqia, OKB-ja, Rusia dhe Ukraina nënshkruan një marrëveshje në Istanbul më 22 korrik për të rifilluar eksportet e grurit nga tre porte ukrainase të Detit të Zi, të cilat u ndaluan pas fillimit të luftës Rusi-Ukrainë në shkurt.
Për të mbikëqyrur dërgesat në Istanbul është hapur një qendër e përbashkët koordinimi me zyrtarë nga të tre vendet dhe OKB-ja.
Që nga nisja e anijes së parë sipas marrëveshjes më 1 gusht, të paktën 100 anije kanë transportuar mbi 2.5 milionë tonë produkte bujqësore nga Ukraina.
