Real Madridi njoftoi sot se Xabi Alonso është larguar nga posti i trajnerit të ekipit të parë me marrëveshje të ndërsjellë, duke i dhënë fund një periudhe me klubin që zgjati më pak se tetë muaj, transmeton Anadolu.

Në një deklaratë, gjiganti spanjoll i futbollit tha: “Xabi Alonso do të mbajë gjithmonë dashurinë dhe admirimin e të gjithë madridistëve, sepse ai është legjendë e Real Madridit dhe ka përfaqësuar gjithmonë vlerat e klubit tonë”.

“Real Madridi do të jetë gjithmonë shtëpia e tij”, shtoi klubi.

Njoftimi erdhi një ditë pasi Barcelona mposhti Real Madridin në finalen e Superkupës së Spanjës.

Në një deklaratë të veçantë, klubi bëri të ditur se Alvaro Arbeloa, ish-bashkëlojtar i Alonsos te Real Madridi, Liverpooli dhe përfaqësuesja e Spanjës, do ta pasojë atë në këtë detyrë.

“Alvaro Arbeloa ka qenë trajner i Castillas që nga qershori i vitit 2025 dhe ka kaluar gjithë karrierën e tij si trajner në akademinë e të rinjve të Real Madridit që nga viti 2020”, thuhet në deklaratë.

Arbeloa do ta nisë detyrën të mërkurën, në ndeshjen në transfertë në kuadër të Kupës së Mbretit ndaj Albacetes.