Can Erozden

Mbrojtësi kroat i klubit turk të futbollit Beşiktaş, Domagoj Vida regjistroi paraqitjen e tij të 100-të në Super Ligë këtë javë duke shënuar një moment historik, shkruan Anadolu Agency (AA).

Vida, 31-vjeç, ishte në 11-ën e parë në ndeshjen e kampionatit të mërkurën ndërsa ekipi i tij shënoi një fitore të thellë 3:0 ndaj Aytemiz Alanyaspor në stadiumit "Vodafone Park" në Stamboll.

Ai erdhi në Beşiktaş nga klubi ukrainas Dynamo Kyiv në vitin 2018 ndërsa kontrata e tij me ekipin turk vlen deri në vitin 2022.

Në 2017-18, sezonin e tij të parë në Beşiktaş, Vida shënoi një gol në 13 paraqitje të Super Ligës. Tani ai po kalon një nga sezonet e tij më të ndritshme në Beşiktaş, duke shënuar 4 gola në 25 ndeshje të ligës për "Shqiponjat e Zeza".

Sezonin e kaluar, qendërmbrojtësi kroat u dallua në klubin e Stambollit pasi shënoi 5 gola në 31 paraqitje të Super Ligës.

Në paraqitjet e tij tre-vjeçare në Turqi, Vida ka shënuar 13 gola në 100 ndeshje në kampionat për Beşiktaşin. Por, në total, Vida ka gjithsej 123 paraqitje për Beşiktaşin, përfshirë ndeshjet e Super Ligës dhe Kupës së Evropës.

Lidhur me këtë, ai shënoi shumicën e golave ​​të tij kundër rivalëve të qytetit, Fenerbahçe. Vida shënoi 3 gola kundër "Kanarinave të Verdha" në derbi, dy gola me kokë dhe një gol në goditje nga afër me këmbën e majtë.

I huaji i tetë në Beşiktaş që shënon 100 paraqitje në ndeshjet e ligës

Vida është bërë lojtari i huaj i tetë në radhët e Beşiktaşit që ka luajtur në të paktën 100 ndeshje të kampionatit.

Mesfushori kanadez i ekipit të Stambollit, Atiba Hutchinson, një lojtar aktiv i Beşiktaşit që nga viti 2013 ka luajtur 233 ndeshje të Super Ligës, duke mbajtur rekord të paraqitjeve të të gjitha kohërave në mesin e të huajve në radhët e "Shqiponjave të Zeza".

Vida duhet të luajë në gjashtë ndeshje të tjera Super Ligës për të kaluar ish-mesfushorin gjerman të klubit Fabian Ernst, i cili shënoi 105 paraqitje në kampionat për Beşiktaşin.

Ernst luajti për Beşiktaşin nga viti 2009 deri në 2012 ndërsa në vitin 2015 ai doli në pension.

Në listën e kryesuar nga Hutchinson, ka shumë veteranë të Beşiktaşit që kanë luajtur në të paktën 100 ndeshje në ligë për klubin, si Tomas Sivok (156), Ricardo Quaresma (154), Filip Holosko (145), Bobo (144), Ronaldo (109) dhe Ernst (105).

Mungojnë titujt me Beşiktaşin

Vida është duke luajtur sezonin e tij të katërt në Beşiktaş, por nuk ka arritur të fitojë asnjë titull vendor.

Para tri viteve të tij në Beşiktaş, Vida luajti për klubet kroate Osijek dhe Dinamo Zagreb, klubin gjerman Bayer Leverkusen dhe atë të Ukrainës, Dynamo Kyiv.

Nga viti 2013 deri në 2018, Vida ishte mbrojtës i Dinamo Kyiv, me të cilin fitoi dy tituj të kampionatit ukrainas, dy Kupa të Ukrainës dhe një Super Kupë të Ukrainës.

Po ashtu ai ishte dy herë kampion i Kroacisë me Dinamo Zagrebin në vitet 2012 dhe 2013.

Vida ka medaljen e argjendtë të Kupës së Botës në sirtarin e tij

Lojtari i rregullt i Beşiktaşit ka qenë gjithashtu një lojtar i dalluar i ekipit kombëtar të Kroacisë. Vida ka 86 paraqitje në ndeshjet ndërkombëtare për Kroacinë që nga debutimi i tij në vitin 2010.

Ai ka shënuar 4 gola për kombëtaren e tij. Vida fitoi medaljen e argjendtë në Kupën e Botës FIFA 2018 të mbajtur në Rusi pasi ishte pjesë e skuadrës së Kroacisë.

Franca ishte ajo që ndërpreu rrugëtimin heroik të Kroacisë në ndeshjen finale në Rusi. Franca mposhti Kroacinë 4:2 në Moskë duke u bërë kampione e botës për të dytën herë.

Vida luajti në ndeshjen finale të vitit 2018, duke u kthyer në shtëpi si nënkampion i Kupës së Botës.