PRISHTINË (AA) – Xhudistja kosovare Majlinda Kelmendi e ka fituar medaljen e artë në Kampionatin Evropian të xhudos, i cili po mbahet në Kazan të Rusisë, raporton Anadolu Agency (AA).

Në finalen e sotme të femrave, në kategorinë deri në 52 kilogram, Majlinda e mposhti francezen Priscilla Gneto dhe atë me Ippon, për t’u kurorëzuar mbretëreshë e Evropës në xhudo.

Kështu, Majlinda gjatë ceremonisë zyrtare të ndarjes së medaljeve në Rusi, ngriti flamurin shtetëror të Kosovës dhe detyroi të gjithë të pranishmit që ta nderojnë himnin e Republikës së Kosovës.

Për Majlindën e cila në karrierën e saj ka tituj shumë më të vlefshëm se ky i kampiones së Evropës, dy tituj rresht të kampiones së botës, megjithatë triumfi në Rusi kishte domethënie shumë të madhe dhe ajo e vlerësoi si “më shumë se fitore sportive”.

Në rrugën e saj deri tek medalja e artë, ajo në xhiron e parë kaloi pa luftë, në rrethin e dytë e mposhti lehtë ukrainasen Oleksandra Starkova,ndërsa në rrethin e tretë e eliminoi izraeliten Roni Schëartz.

Luftën më të vështirë, Majlinda e pati në gjysmëfinale, ku u ndesh me francezen Euranie Annabelle, të cilën e mposhti vetëm falë aktivitetit më të madh në duel.

Ndërkohë, në finale ajo hyri në ritmin e saj shkatërrues dhe me Ippon spastroi francezen tjetër Gnetto, që përndryshe kishte eliminuar në gjysmëfinale rumunen Chitu e cila aktualisht prinë në rang listën botërore të xhudistëve, në kategorinë deri në 52 kilogram.

Por, kjo do të ndryshoië pas këtij kampionati dhe triumfit të madh të Majlindës e cila pas operimit të gjurit dhe mungesës gati 8 mujore të tatamit ndërkombëtar, është duke u kthyer në maje dhe në formën më të mirë të jetës, pikërisht para Lojërave Olimpike Verore “Rio 2016”, ku vlerësohet si njëra nga kandidatet potenciale për medalje të artë