Kombëtarja e Kosovës në futboll e ka humbur me rezultat 0 me 1 ndeshjen e fundit në kuadër të kualifikimeve për Kampionatin Evropian EURO 2024 ndaj kombëtares së Bjellorusisë në stadiumin “Fadil Vokrri” në Prishtinë, raporton Anadolu.

Bjellorusia kaloi në epërsi ndaj Kosovës në minutën e 43-të me golin e Dmitry Antilevskyt për 0 me 1, rezultat me të cilin u mbyll ndeshja.

Kosova u përpoq të shënonte golin e barazimit sidomos në fundin e pjesës së dytë, por nuk arriti të konkretizonte me gol ndonjë rast.

Kosova me këtë ndeshje e përfundoi raundin e ndeshjeve për kualifikimet në EURO 2024 në pozitën e parafundit apo në vendin e 5-të të Grupit I me gjithsej 11 pikë të grumbulluara.

Bjellorusia me fitore doli në vendin e katërt me 12 pikë.

Rumania ka fituar grupin me 22 pikë, ndërsa Zvicra është kualifikuar si e dyta me 17 pikë.

Po ashtu, në këtë grup Izraeli është renditur i treti me 15 pikë, ndërsa Andorra e përfundoi kampanjën kualifikuese me vetëm dy pikë si e fundit në tabelë.