STAMBOLL (AA) - Kina do të ndajë 3.49 milionë dollarë në fonde dyvjeçare për të mbështetur përpjekjet për parandalimin e HIV-it në Afrikën e Jugut, njoftoi agjencia shtetërore "Xinhua News", transmeton Anadolu.

Marrëveshja e organizuar nga UNAIDS u njoftua në një ceremoni në ambasadën kineze në Pretoria, kryeqytetin administrativ të Afrikës së Jugut.

Afrika e Jugut, shtëpia e rreth 8 milionë njerëzve që jetojnë me HIV dhe gati 6 milionë që marrin trajtim antiretroviral, i ka dhënë përparësi reduktimit të infeksioneve të reja, veçanërisht midis grupeve me rrezik të lartë si adoleshentët dhe të rinjtë.

Drejtoresha ekzekutive e UNAIDS-it, Winnie Byanyima tha se investimi pasqyron mbështetjen e Kinës për bashkëpunimin shumëpalësh dhe partneritetet "Jug-Jug".

"Kjo tregon angazhimin shumëpalësh të Kinës dhe avancimit të bashkëpunimit 'Jug-Jug', përmes ndarjes së teknologjisë, inovacionit dhe financimit me grante në ndjekjen tonë të mbulimit shëndetësor universal dhe qëllimit për t'i dhënë fund AIDS-it deri në vitin 2030", tha ajo.

Ambasadori kinez në Afrikën e Jugut, Wu Peng tha se projekti përfaqëson përparim konkret në kuadër të Iniciativës Globale për Zhvillim dhe kontribuon në ndërtimin e një "komuniteti global shëndetësor për të gjithë".

"Kina qëndron fort me Afrikën e Jugut ndërsa ajo forcon programet e saj të parandalimit dhe trajtimit të HIV-it. Përveç këtij projekti, ne jemi të gatshëm të ndihmojmë Afrikën e Jugut në krijimin e një sistemi të qëndrueshëm të reagimit ndaj HIV/AIDS-it përmes dialogut politik", shtoi ai.

Iniciativa dyvjeçare pritet të mbështesë programet e parandalimit të HIV-it që arrijnë në 54 mijë adoleshentë dhe të rinj.