Platforma e rrjeteve sociale NSosyal me bazë në Turqi ka paraqitur një sërë veçorish të reja për përdoruesit e saj, ndër më të spikaturat prej të cilave është funksionaliteti i shumëpritur i postimeve të përkohshme (story), transmeton Anadolu.

Siç thuhet në shënimet më të fundit të përditësimit në platformën e aplikacioneve, përmirësimet kryesore në krijimin e përmbajtjes dhe ndërveprimin përfshijnë modalitetin "story", përgjigje të aktivizueshme dhe të çaktivizueshme në postime, kërkim të postimeve brenda profilit dhe aftësinë për të fiksuar deri në tre postime në profilet e përdoruesve.

Përditësimet shtesë përfshijnë formular aplikimi për llogari të verifikuara, lista të kërkueshme të ndjekësve dhe atyre që ndiqen, kontrolle brenda aplikacionit për ndryshimin e emrit të përdoruesit, postës elektronike dhe fjalëkalimit, opsione për çaktivizimin e llogarisë si dhe menu navigimi të përmirësuara.

Gjithashtu janë përmirësuar prerja dhe shkallëzimi i imazhit të profilit për një përvojë më të mirë përdoruesi.

E nisur në korrik të vitit 2025 nga Fondacioni i Ekipit Teknologjik të Turqisë (T3 Vakfi) në bashkëpunim me Baykar Technology, fillimisht nën emrin Next Sosyal, platforma e kaloi shpejt shifrën e 1 milion përdoruesve pas nisjes, duke u konsoliduar si një nga aplikacionet vendase të rrjeteve sociale me rritjen më të shpejtë në vend.