OpenAI prezantoi kontrollet prindërore për ChatGPT, duke u dhënë prindërve mjete të reja për të menaxhuar se si adoleshentët e tyre përdorin chatbot-in e inteligjencës artificiale, transmeton Anadolu.

Kontrollet, të disponueshme për të gjithë përdoruesit e ChatGPT duke filluar nga kjo javë, u lejojnë prindërve të lidhin llogarinë e tyre me llogarinë e një adoleshenti dhe të rregullojnë cilësimet për një përvojë të përshtatshme për moshën.

Prindërit do të jenë në gjendje të caktojnë orë të qeta, të çaktivizojnë modalitetin e zërit, të bllokojnë gjenerimin e imazheve dhe të çaktivizojnë memorjen.

Pasi të lidhen, llogaritë e adoleshentëve do të marrin automatikisht mbrojtje shtesë, të tilla si ekspozim i reduktuar ndaj përmbajtjes grafike, sfidave virale, lojërave seksuale ose të dhunshme me role dhe idealeve ekstreme të bukurisë.

Më parë këtë muaj, Komisioni Federal i Tregtisë i SHBA-së hapi një hetim ndaj disa kompanive të mediave sociale dhe IA-së mbi rreziqet e mundshme për fëmijët dhe adoleshentët që përdorin chatbot-e si shoqërues. Agjencia tha se u dërgoi letra tek Alphabet, Meta Platforms, Snap, Character Technologies, OpenAI dhe xAI duke kërkuar informacion në lidhje me praktikat e tyre.

"Ne po lançojmë kontrollet prindërore dhe një faqe të re burimesh për prindërit për të ndihmuar familjet të udhëzojnë se si funksionon ChatGPT në shtëpitë e tyre", tha OpenAI në njoftimin e saj.

Kompania tha se ka punuar me ekspertë, grupe avokatie, përfshirë Common Sense Media dhe prokurorët e përgjithshëm të Kalifornisë dhe Delaware për të formësuar qasjen e saj.