Miliarderi i teknologjisë Elon Musk tha se planifikon të bëjë publik një algoritëm të ri që rregullon operacionet e platformës së tij të mediave sociale X me bazë në SHBA, transmeton Anadolu.

"Ne do ta bëjmë algoritmin e ri X, përfshirë të gjithë kodin e përdorur për të përcaktuar se cilat postime organike dhe reklamuese u rekomandohen përdoruesve, me burim të hapur brenda 7 ditësh", njoftoi Musk në platformën e tij.

Ai shtoi se përditësimet do të publikohen çdo katër javë dhe do të shoqërohen me shënime të hollësishme nga zhvilluesit që shpjegojnë ndryshimet.

"Komisioni Evropian javën e kaluar ra dakord të zgjasë një urdhër mbajtjeje të vendosur ndaj X vitin e kaluar për algoritmet e tij dhe përhapjen e përmbajtjes së paligjshme, duke e zgjatur kërkesën deri në fund të vitit 2026", ka thënë zëdhënësi Thomas Regnier.

Prokurorët e Parisit korrikun e kaluar hapën hetim ndaj X për manipulim të dyshuar të algoritmit dhe mbledhje të pahijshme të të dhënave, të cilat platforma i hodhi poshtë si një hetim i motivuar politikisht që kërcënon lirinë e fjalës.

Lajmi vjen ndërsa Musk është nën kritika për chatbot-in Grok AI, të lidhur me X, i cili u ofron përdoruesve manipulim dixhital të imazheve të rreme, përfshirë gra dhe fëmijë.

I përballur me stuhi kritikash, aftësia e manipulimit u kufizua vetëm tek abonentët që paguanin, veprim që bëri pak për të shuar dënimin nga një mori vendesh.

Të shtunën, Musk tha se trazira ishte pjesë e përpjekjeve për të "shtypur lirinë e fjalës".