Shkencëtarët në Mbretërinë e Bashkuar kanë identifikuar një specie të re dinozauri që mbante një strukturë të mrekullueshme si velë përgjatë shpinës dhe bishtit, që besohet se është përdorur për të tërhequr partnerë, raportoi të premten transmetuesi irlandez RTE, transmeton Anadolu.

Dinozauri "iguanodontian" i klasifikuar rishtazi, i quajtur "Istiorachis macaruthurae", jetoi rreth 125 milionë vjet më parë gjatë periudhës së hershme të Kretakut.

Fosilet u zbuluan në Ishullin Wight, pranë bregut jugor të Anglisë, dhe u analizuan nga studenti i doktoraturës dhe mjeku i përgjithshëm në pension Jeremy Lockwood, në bashkëpunim me Universitetin e Portsmouth dhe Muzeun e Historisë Natyrore.

Speciet u emëruan për nder të marinares britanike Ellen MacArthur, e cila vjen nga ishulli dhe u bë e njohur ndërkombëtarisht për vendosjen e rekordit botëror për lundrimin më të shpejtë solo pa ndalesa rreth globit në vitin 2005.

Emri përkthehet si "shpinë vele", e kombinuar me mbiemrin e MacArthur.

Lockwood tha se forma e pazakontë e kockave fosile e dallonte specien nga iguanodontianët e njohur më parë. "Mendohej të ishte thjesht një ekzemplar tjetër i një prej specieve ekzistuese, por ky kishte shtylla nervore veçanërisht të gjata, gjë që ishte shumë e pazakontë", shpjegoi ai.

Hulumtimi, i botuar në Papers in Palaeontology, sugjeron që Istiorachis zotëronte një velë të përpunuar përgjatë shpinës.

Sipas Lockwood, shpjegimi më i mundshëm është se tipari shërbeu si sinjalizim vizual, potencialisht për përzgjedhje seksuale.

"Evolucioni nganjëherë duket se favorizon ekstravagancën mbi praktikën", tha ai.

"Tek zvarranikët modernë, strukturat e velave shpesh shfaqen më dukshëm tek meshkujt, duke sugjeruar që këto atribute evoluan për të bërë përshtypje tek partnerët ose për të frikësuar rivalët. Ne mendojmë se Istiorachis mund të ketë bërë pak a shumë të njëjtën gjë", shtoi ai.

Gjetjet u bazuan në krahasime me një bazë të dhënash të kockave të fosilizuara të ngjashme nga dinozaurë të tjerë.

Studiuesit arritën në përfundimin se gjembat e Istiorachis nuk ishin vetëm të larta, por edhe më të ekzagjeruara se sa është tipike për familjen e tyre, duke përforcuar idenë se kjo veçori evoluoi përmes përzgjedhjes seksuale.