Ministri i Jashtëm ukrainas, Andrii Sybiha tha se presidenti Volodymyr Zelenskyy është gati të takohet me homologun e tij rus, Vladimir Putin për të adresuar çështjet "më të ndjeshme" në një plan paqeje prej 20 pikash për t'i dhënë fund luftës gati katërvjeçare, transmeton Anadolu.

Në komentet për gazetën online ukrainase "European Pravda" të botuara të martën, Sybiha tha se vendi i tij po kërkon të nënshkruajë planin e paqes që është në diskutim që nga nëntori i vitit të kaluar, me kusht që marrëveshja të miratohet, duke vënë në dukje se çështjet "më të ndjeshme" ende nuk janë zgjidhur, përkatësisht territoret dhe funksionimi i centralit bërthamor Zaporizhzhia.

"Pikërisht për t'i zgjidhur ato, presidenti është gati të takohet me Putinin dhe të diskutojë këtë", tha Sybiha duke shprehur se nuk e sheh nevojën për t'u takuar me homologun e tij rus, Sergey Lavrov, duke argumentuar se ata "nuk duhet të krijojnë pista paralele".

"Ka ekipe negociuese që përfshijnë përfaqësues të Ministrisë së Punëve të Jashtme. Dhe krijimi i pistave shtesë nuk është në kohën e duhur dhe i panevojshëm", tha ai.

Duke komentuar bisedimet midis Rusisë, Ukrainës dhe SHBA-së në kryeqytetin e Emirateve të Bashkuara Arabe, Abu Dhabi, javën e kaluar, Sybiha tha se ka përparim në negociatat për t'i dhënë fund konfliktit, për shkak të të cilit u zhvilluan bisedimet trepalëshe.

Ai konfirmoi se diskutimet dypalëshe u zhvilluan edhe në Abu Dhabi, duke i përshkruar negociatat si "shumë komplekse" dhe se bisedat e zhvilluara ishin "shumë të fokusuara".

Sybiha tha se u zhvillua një pistë e veçantë negociatash që përfshinte përfaqësues ushtarakë nga të dyja palët, duke vënë në dukje se kishte diskutime "substanciale" mbi parametrat e një armëpushimi dhe se si do të monitorohej ose verifikohej një ndalim i tillë i armiqësive.

"Po diskutohet për dokumentin kornizë prej 20 pikash. Ky është një dokument dypalësh që SHBA-ja do ta nënshkruajë me Ukrainën", tha ai.

"Dhe me Rusinë, SHBA-në duhet ta nënshkruajnë (veçmas). Deri tani, kjo është pikërisht struktura që po diskutohet, por negociatat janë ende duke vazhduar. Është një proces", shtoi kryediplomati ukrainas.