Presidenti i SHBA-së, Donald Trump, ka bërë të ditur se qeveria federale po lëshon udhëzime të reja për të mbrojtur të drejtën e lutjes në shkollat publike, transmeton Anadolu.

“Sot jam gjithashtu i kënaqur të njoftoj se Departamenti i Arsimit po lëshon zyrtarisht udhëzimet e reja për të mbrojtur të drejtën e lutjes në shkollat tona publike”, tha Trump gjatë Mëngjesit Kombëtar të Lutjes, që u mbajt për herë të 74-të.

Trump e quajti këtë hap “një çështje të madhe”.

Njoftimi vë në dukje theksin e vazhdueshëm të administratës amerikane mbi lirinë fetare si pjesë e agjendës së saj më të gjerë arsimore dhe kulturore.

Trump parashikoi se demokratët do ta padisin administratën pas këtij njoftimi.

“Por ne do ta fitojmë. Ata më kanë paditur për gjithçka. Unë jam njeriu më i paditur në histori. Më kanë ngritur dy herë procedurë shkarkimi pa asnjë arsye”, shtoi ai.

Çështja e lutjes në shkollat publike në SHBA prej dekadash ka qenë një temë e debatueshme. Kundërshtarët thonë se lutja e organizuar shkel parimin kushtetues të ndarjes së kishës nga shteti, ndërsa mbështetësit i referohen asaj që ata e quajnë “shoqëri judeo-krishtere” e SHBA-së, pavarësisht rritjes së larmisë fetare, si dhe numrit të personave jofetarë në shoqëri.