HAMILTON (AA) - Sekretari i Përgjithshëm i OKB-së, Antonio Guterres, paralajmëroi për përkeqësimin e shpejtë të situatës humanitare në Rripin e Gazës, duke e përshkruar atë si një “shfaqje horror” të shënuar nga shkatërrime masive dhe uri, raporton Anadolu.

“Nuk kemi nevojë të shohim përtej shfaqjes horror në Gaza – me një nivel vdekjesh dhe shkatërrimi të pashoq në kohët e fundit”, i tha Guterres Këshillit të Sigurimit të OKB-së gjatë një debati mbi multilateralizmin dhe zgjidhjen paqësore të mosmarrëveshjeve.

“Kequshqyerja është në rritje. Uria po troket në çdo derë. Dhe tani po shohim frymën e fundit të një sistemi humanitar të ndërtuar mbi parime humanitare”, tha ai, duke shtuar: “Këtij sistemi po i mohohen kushtet për të funksionuar. Po i mohohet hapësira për të ofruar. Po i mohohet siguria për të shpëtuar jetë”.

Ai dënoi operacionet ushtarake të Izraelit, duke theksuar se “me intensifikimin e operacioneve ushtarake izraelite dhe urdhrat e rinj të zhvendosjes të lëshuar në Deir al-Balah (në pjesën qendrore të Rripit të Gazës), shkatërrimi po shtresohet mbi shkatërrim”.

Guterres vuri në dukje gjithashtu se situata në Gaza pasqyron një dështim më të gjerë për të përmbushur detyrimet ndërkombëtare, pasi “konflikti po ashpërsohet, ligji ndërkombëtar po shkelet dhe uria dhe zhvendosja janë në nivele rekord” në rajone nga Ukraina dhe Sudani deri në Haiti dhe Mianmar.

Shefi i OKB-së dënoi sulmet e fundit ndaj objekteve të OKB-së në Gaza dhe tha: “Jam i tmerruar që janë goditur objektet e OKB-së – midis tyre objektet e Zyrës së OKB-së për Shërbime Projektesh dhe të Organizatës Botërore të Shëndetësisë, përfshirë depon kryesore të OBSH-së”.

“Këto ambiente, si të gjitha vendet civile, janë të paprekshme dhe duhet të mbrohen sipas ligjit ndërkombëtar humanitar – pa përjashtim”, tha Guterres.