Koordinatori i Shtëpisë së Bardhë për çështjet e kufirit, Tom Homan, ka bërë të ditur se zyrtarë të administratës së presidentit Donald Trump po punojnë për një plan për të reduktuar së shpejti numrin e agjentëve të Agjencisë së Imigracionit dhe Doganave (ICE) në qytetet binjake Minneapolis dhe St. Paul në Minnesota, transmeton Anadolu.

Homan pranoi se ka mangësi në masat e administratës mbi imigrantët, por tha se ulja e numrit të oficerëve të ICE-it varet nga zbatimi i marrëveshjeve me zyrtarët e shtetit dhe ata lokalë. Ai u tha gazetarëve në Minneapolis se tërheqja e burimeve të zbatimit të ligjit do të jetë vetëm në varësi të masës së bashkëpunimit.

“Ne kemi disa marrëveshje. Duhet edhe më shumë diskutime se si do t’i zbatojmë këto marrëveshje. Por ndërsa shohim që ky bashkëpunim ndodh, atëherë do të ndodhë edhe tërheqja”, tha ai.

Në Minnesota ka pasur protesta të gjata kundër operacioneve të ICE-it dhe ndjekjeve federale për mbi një muaj, pas dy vrasjeve të amerikanëve nga agjentë federalë, përfshirë Alex Pretti, një infermier 37-vjeçar që u qëllua për vdekje nga agjentë gjatë një operacioni, dhe Renee Nicole Good, një nënë me tre fëmijë e vrarë më 7 janar.

Këto vrasje kanë shkaktuar zemërim dhe protesta në Minneapolis dhe më gjerë, me kërkesa për hetime të pavarura dhe kritika ndaj metodave të ligjzbatimit federal.