Kremlini ka deklaruar se nënshkrimi i një traktati paqeje midis Rusisë dhe Japonisë është i “pamundur” pa një ndryshim në modalitetet e marrëdhënieve midis Moskës dhe Tokios, transmeton Anadolu.

Në një konferencë për media, zëdhënësi i Kremlinit, Dmitry Peskov, tha se marrëdhëniet midis Rusisë dhe Japonisë janë “reduktuar në zero” dhe se nuk ka dialog që po zhvillohet midis dy vendeve.

“Diskutimi i një traktati paqeje pa dialog është i pamundur”, tha Peskov.

Duke theksuar se Moska kurrë nuk e ka mbështetur ndërprerjen e dialogut dypalësh, Peskov pretendoi se ai u “ndërpre me nismën e Tokios” dhe se Japonia mban një qëndrim “jo miqësor” ndaj Rusisë.

“Në këto rrethana, është e pamundur që të arrihen marrëveshje pa ndryshuar modalitetet e marrëdhënieve tona”, shtoi ai.

Të dy vendet kanë një mosmarrëveshje territoriale të vazhdueshme mbi katër ishujt jugor të Kurileve, përkatësisht Etorofu, Kunashiri, Shikotan dhe ishujt Habomai, të cilët kontrollohen nga Rusia, por që Japonia i konsideron si Territoret Veriore.

Mosmarrëveshja ka penguar nënshkrimin e një traktati paqeje midis dy vendeve që nga Lufta e Dytë Botërore, dhe tensionet janë thelluar vitet e fundit për shkak të sanksioneve të Tokios ndaj Moskës lidhur me luftën Rusi-Ukrainë.