Presidenti palestinez, Mahmoud Abbas deklaroi se ka qenë në bisedime intensive me qëllim për të bërë presion mbi Izraelin për të mbajtur zgjedhje në të gjitha territoret palestineze, përfshirë Kudsin e okupuar, transmeton Anadolu Agency (AA).

Në takimin e Komitetit Qendror të mbajtur në Qendrën Presidenciale në Ramallah, Abbas tha se ka zhvilluar bisedime me shumë vende, veçanërisht me OKB-në, Bashkimin Evropian dhe SHBA-në.

Duke kujtuar se ende nuk ka asnjë përgjigje nga Izraeli në lidhje me zgjedhjet e planifikuara të mbahen edhe në Kuds, Abbas theksoi se po punojnë për realizimin e zgjedhjeve në kohën e caktuar.

Palestina do të mbajë zgjedhje për herë të parë pas 15 vitesh

Për herë të parë në 15 vjet, presidenti palestinez Abbas nënshkroi dekretin që përcakton mbajtjen e zgjedhjeve parlamentare më 22 maj, presidenciale më 31 korrik dhe për Këshillin Kombëtar Palestinez më 31 gusht.

Kushtetuta palestineze parashikon zgjedhje të përgjithshme çdo 4 vjet. Zgjedhjet e përgjithshme nuk janë mbajtur për vite për shkak të copëzimit që ka ndodhur që nga viti 2006 në vend nën okupimin dhe bllokadën izraelite.