Polonia pritet të shqyrtojë amendamente në ligjin e saj për Sistemin Kombëtar të Sigurisë Kibernetike, derisa rritet presioni nga SHBA-ja për të bllokuar kompanitë kineze të teknologjisë, përfshirë Huawei-n, nga pjesëmarrja në projektet e infrastrukturës digjitale kritike, transmeton Anadolu.

Siç raporton transmetuesi TVP World, legjislacioni, që pret nënshkrimin e presidentit Karol Nawrocki, konsiderohet si një nga projektligjet më të rëndësishme të këtij mandati parlamentar.

Ai parashikon zgjerimin e rregullave të sigurisë kibernetike për të përfshirë sektorë si menaxhimi i teknologjisë së informacionit dhe komunikimit, shërbimet e ujërave të ndotura, shpërndarjen e ushqimit, shërbimet postare dhe prodhimin kimik.

Ligji do t’u jepte autoriteteve kompetencën të përcaktojnë kompani teknologjike si “ofrues me rrezik të lartë”, duke i përjashtuar praktikisht nga tenderët publik.

Ekspertët thanë se kjo mund të pengojë kompani kineze si Huawei dhe ZTE të marrin pjesë në projektet e infrastrukturës digjitale.

“Në vitin 2025 kemi regjistruar 272 mijë incidente të sigurisë kibernetike, më shumë se dyfishi i numrit në vitin 2024. Prandaj duhet të forcojmë Rrjetin Kombëtar të Sigurisë Kibernetike”, tha Dariusz Standerski, zv/ministër i Çështjeve Digjitale, për portalin e lajmeve Wirtualna Polska.

Sipas një burimi anonim qeveritar të cituar nga Wirtualna Polska, zyrtarët amerikanë e kanë ngritur vazhdimisht këtë çështje në diskutimet me homologët e tyre polakë, duke theksuar se pothuajse të gjitha takimet e fundit kanë përfshirë pyetje mbi të ardhmen e ligjit për sigurinë kibernetike.

SHBA-ja gjithashtu ka ndërmarrë hapa për të kufizuar Huawei-n dhe ZTE-n për shkak të shqetësimeve të sigurisë kombëtare, duke ndaluar pajisjet e tyre në rrjetet federale dhe duke financuar heqjen e pajisjeve kineze të telekomunikacionit.

Në të njëjtën kohë, zyrtarët kinezë raportohet se po ushtrojnë presion prapa skenave. Pekini ka sinjalizuar se rifillimi i eksporteve polake të mishit të shpendëve, të vonuara prej vitesh, mund të varet nga vendimi i presidentit Nawrocki për këtë ligj.

Një burim anonim qeveritar tha për Wirtualna Polska se Ministria e Bujqësisë ka planifikuar të dërgojë ngarkesën e parë të shpendëve në Kinë në muajin dhjetor.

“Sigurisht që kjo nuk ndodhi dhe as nuk do të ndodhë, pasi kinezët e bënë këtë shumë të qartë”, tha burimi.

Sipas transmetuesit, presidenti polak tani po përballet me një zgjedhje strategjike mes rreshtimit me Washingtonin ose rrezikimit të hakmarrjes ekonomike nga Pekini.