Më shumë se 80 shtete anëtare të OKB-së dhe disa organizata kanë dënuar vendimet e “njëanshme” të Izraelit që synojnë zgjerimin e “pranisë së paligjshme” në Bregun Perëndimor të pushtuar, transmeton Anadolu.

Duke lexuar një deklaratë në një konferencë për media në selinë e OKB-së në New York, përfaqësuesi i Palestinës në OKB, Riyad Mansour, tha: “Kam nderin të paraqes këtë deklaratë në emër të 80 shteteve dhe një numri organizatash lidhur me vendimet e fundit izraelite për Bregun Perëndimor të pushtuar”.

“Ne dënojmë fuqishëm vendimet dhe masat e njëanshme izraelite që synojnë zgjerimin e pranisë së paligjshme të Izraelit në Bregun Perëndimor. Vendime të tilla bien ndesh me detyrimet e Izraelit sipas së drejtës ndërkombëtare dhe duhet të zhbëhen menjëherë,” tha Mansour, duke theksuar “kundërshtimin tonë të fortë ndaj çdo forme aneksimi”.

Grupi ritheksoi refuzimin e “të gjitha masave që synojnë ndryshimin e përbërjes demografike, karakterit dhe statusit të Territorit Palestinez të pushtuar që nga viti 1967, përfshirë Kudsin Lindor”.

“Masat e tilla shkelin të drejtën ndërkombëtare, minojnë përpjekjet e vazhdueshme për paqe dhe stabilitet në rajon, bien ndesh me Planin Gjithëpërfshirës dhe rrezikojnë perspektivën për arritjen e një marrëveshjeje paqeje që do t’i jepte fund konfliktit”, thuhet në deklaratë.

Shtetet nënshkruese riafirmuan gjithashtu angazhimin e tyre, të pasqyruar në Deklaratën e New Yorkut për “të ndërmarrë masa konkrete, në përputhje me të drejtën ndërkombëtare” dhe në linjë me rezolutat përkatëse të OKB-së dhe opinionin këshillimor të korrikut të vitit 2024 të Gjykatës Ndërkombëtare të Drejtësisë, i cili e shpalli të paligjshëm pushtimin izraelit të territoreve palestineze dhe bëri thirrje për evakuimin e të gjitha vendbanimeve në Bregun Perëndimor dhe Kudsin Lindor.

Deklarata theksoi se një “paqe e drejtë dhe e qëndrueshme”, e bazuar në rezolutat përkatëse të OKB-së, kushtet e referencës së Madridit, parimin tokë për paqe dhe Nismën Arabe për Paqe, “mbetet e vetmja rrugë për të siguruar siguri dhe stabilitet në rajon”.

Izraeli ka intensifikuar operacionet ushtarake në Bregun Perëndimor, përfshirë Kudsin Lindor, që nga fillimi i luftës në Rripin e Gazës në tetor të vitit 2023. Sipas zyrtarëve palestinezë, operacionet kanë përfshirë vrasje, arrestime, zhvendosje dhe zgjerim të vendbanimeve.

Sipas të dhënave zyrtare palestineze, të paktën 1.114 palestinezë janë vrarë, 11.500 janë plagosur dhe 22 mijë janë arrestuar në Bregun Perëndimor, përfshirë Kudsin Lindor.

Të dielën, qeveria izraelite miratoi një propozim për regjistrimin e sipërfaqeve të mëdha në Bregun Perëndimor si “pronë shtetërore”, për herë të parë që nga pushtimi i territorit në vitin 1967.

Palestinezët paralajmërojnë se veprimet e Izraelit hapin rrugën për një aneksim formal të Bregut Perëndimor të pushtuar, gjë që, sipas tyre, do të shkatërronte perspektivën për krijimin e një shteti palestinez të parashikuar në rezolutat e OKB-së.