STAMBOLL (AA) - Kryeministri malajzian, Anwar Ibrahim, ka bërë të ditur se Tajlanda dhe Kamboxhia kanë nevojë për pak kohë për të tërhequr trupat e tyre nga kufiri në kuadër të një armëpushimi, derisa luftimet ndërkufitare vazhduan për të dytën ditë, transmeton Anadolu.

“Dje, pata një bisedë telefonike me kryeministrin në detyrë të Tajlandës dhe kryeministrin e Kamboxhias, për shkak të pozicionit të Malajzisë dhe respektit të tyre për ne”, tha Anwar në adresimin e tij në një ngjarje.

Kryeministri në detyrë i Tajlandës, Phumtham Wechayachai, ka fajësuar Kamboxhian për nisjen e konfliktit të fundit të armatosur duke përdorur “forcën ushtarake fillimisht”, ndërsa vendosi ligjin ushtarak në provincat kufitare.

Ndërkohë, kryeministri i Kamboxhias, Hun Manet, tha se ia ka bërë të qartë kryeministrit malajzian se Kamboxhia është dakord me propozimin e tij për një armëpushim, por shtoi se Tajlanda e ndryshoi mbështetjen e saj fillestare për armëpushimin.

“Pala tajlandeze kishte rënë dakord me propozimin e tij për një armëpushim, duke vendosur orën 12:00 të mëngjesit më 24 korrik 2025 si kohën kur të dyja palët duhet të ndërpresin luftimet”, tha Manet në rrjetet sociale.

Por, theksoi ai, është për të ardhur keq që “pak më shumë se një orë më vonë, pala tajlandeze informoi se kishte ndryshuar qëndrimin e saj nga rënia dakord për armëpushim, në mos rënie dakord dhe pritje të një date të mëvonshme”.