Bashkëpunimi strategjik i Kinës me Kanadanë pasqyron barazi dhe përfshirje, tha Pekini sot, duke iu përgjigjur kërcënimeve të presidentit amerikan Donald Trump për të bllokuar një urë që lidh Ontarion me Michiganin, transmeton Anadolu.

“Kina dhe Kanadaja kanë krijuar një lloj të ri bashkëpunimi strategjik”, tha zëdhënësi i Ministrisë së Jashtme, Lin Jian, në një konferencë për media në Pekin.

“Kjo pasqyron barazi, hapje dhe përfshirje, bashkëpunim paqësor dhe përfitim të ndërsjellë. Nuk përfshin asnjë palë të tretë”, shtoi Lin.

Ai tha se bashkëpunimi “u shërben interesave të përbashkëta të popujve të të dy vendeve dhe kontribuon në paqen, stabilitetin, zhvillimin dhe prosperitetin botëror”.

Komentet e zyrtarit kinez erdhën pasi Trump kritikoi të hënën urën e sapondërtuar Ontario-Michigan, duke pretenduar se Kanadaja e ka ndërtuar atë me “praktikisht asnjë përmbajtje amerikane”.

Trump paralajmëroi se projekti nuk do të vazhdojë nëse nuk plotësohen kërkesat e Washingtonit.

“Nuk do ta lejoj këtë urë të hapet derisa Shtetet e Bashkuara të kompensohen plotësisht për gjithçka që u kemi dhënë atyre dhe, po ashtu e rëndësishme, derisa Kanadaja t’i trajtojë Shtetet e Bashkuara me drejtësinë dhe respektin që meritojmë”, tha ai.