LONDËR (AA) - Ministri italian i Punëve të Jashtme, Antonio Tajani, ka riafirmuar “angazhimin e plotë” të vendit të tij për t’i dhënë fund operacioneve izraelite në Gaza, transmeton Anadolu.

Siç raportohet nga agjencia italiane e lajmeve ANSA, në një deklaratë të lëshuar nga Ministria e Punëve të Jashtme e Italisë, Tajani pas telefonave të tij me homologët nga Katari, Egjipti dhe Kanada tha se “mundësia e një armëpushimi të parë 60-ditor është një hap vendimtar që nuk duhet humbur”.

"Ndërmjetësimi i SHBA-së, Egjiptit dhe Katarit duhet të jetë i suksesshëm. Italia do të bëjë atë që është e nevojshme në G7 dhe BE për ta mbështetur atë", tha Tajani.

Presidenti i SHBA-së, Donald Trump, tha se Izraeli ka rënë dakord për "kushtet e nevojshme" për të finalizuar një armëpushim 60-ditor në enklavë, duke i kërkuar grupit palestinez të rezistencës Hamas ta pranojë propozimin.

"Sulmet që përfshijnë civilë palestinezë duhet të ndalen, pengjet izraelite duhet të lirohen, një armëpushim duhet të konsolidohet dhe Rripi i Gazës të rihapet për të ndihmuar", tha ministri italian.

Pavarësisht thirrjeve ndërkombëtare për armëpushim, ushtria izraelite që nga tetori i vitit 2023 vazhdon luftën gjenocidale në Rripin e Gazës, duke vrarë të paktën 57 mijë palestinezë, shumica prej tyre gra dhe fëmijë.

Nëntorin e kaluar, Gjykata Ndërkombëtare Penale lëshoi ​​urdhër-arreste ndaj kryeministrit izraelit, Benjamin Netanyahu dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.

Izraeli gjithashtu përballet me një padi gjenocidi në Gjykatën Ndërkombëtare të Drejtësisë për luftën në enklavën palestineze.